Ni Sheila C. Gravinez
Monday, June 11, 2012
TUNGOD sa pagtan-aw sa away ni Manny Pacquiao ug Timothy Bradley, usa ka 19-anyos nga lalake ang gipaak sa
iyang 14-anyos nga kapuyo sa Barangay Jaclupan, dakbayan sa Talisay niadtong Dominggo sa hapon.
Si Jan-Jan Abastas, 19, personal nga niadto sa Talisay Police Station aron ipa-blotter ang gihimo sa iyang kapuyo
nga si Karla (di tinuod nga pangan) nga nipaak sa nagkadaiyang bahin sa iyang lawas.
Nanglagom pa ang panit sa bukton ug buko-buko ni Jan-Jan agi og pinaakan sa iyang live-in partner.
Si PO2 Oliver Ortega, imbestigador sa Talisay Police Station nagkanayon nga niasoy ang biktima nga samtang
nagtan-aw siya og salida sa telebisyon sa away ni Pacquiao ug Bradley ala 1:00 sa hapon, iyang gimanduan
si Karla nga manglaba sa ilang mga bulingon nga sinena.
Apan gikasuko kini sa menor-de-edad ug kalit siya gihamag, gibugno dayon gipaak-paak ang nagkadaiyang bahin sa iyang lawas.
Si Jan-Jan wala na makasagang sa iyang kapuyo nga naglungot-lungot sa pagpaak kaniya.
“Nasuko tingali siya (Karla) nga nagsige lang og mandar-mandar ang lalake, unya siya sige og tan-aw sa away ni Pacquiao.
Daghan sad tingali ang labhanon maong gisapot unya napaakan siya,†asoy ni Ortega dihang nahinabi sa Sun.Star Superbalita kagahapon.
Human sa hitabo si Karla mibiya sa balay sa lalake hinungdan nga nagpa-blotter si Jan-Jan sa kapulisan.
Ang duha naa magpuyo sa panimay sa mga ginikanan sa lalake.
Gipatik sa mantalaang SuperBalita Cebu Hunyo 12, 2012.
Linkback:
https://tubagbohol.mikeligalig.com/index.php?topic=51228.0