Ni KRIS C. SIALANA
TULO ka mga samad ang naangkon sa usa ka caretaker kinsa napalgang patay sulod sa barungbarong niadtong Lunes sa Sitio Pahiron, Upper Pagatpat ning siyudad sa Cagayan de Oro.
Ang biktima naila nga mao si Christopher Salem, 37, adunay kaipon, caretaker sa farm nga gipanag-iyahan ni PO3 Marcelino Escartin ug lumad sa Poblacion, Claveria Misamis Oriental.
Sa nahipos nga report sa Sun.Star SuperBalita sa Police Station 7 (PS7) sa Bulua, gikabutyag ni Police Inspector Danilo Calurasan nga padayon pa ang ilang imbestigasiyon sa maong insidente.
Nasayran nga nadiskobre nila Edgar Bomotano, 31, ug Reinhard Escartin, 22, ulitawo, ang patay'ng lawas human sila gisugo sa tag-iya sa maong farm nga pakaunon ang mga binuhing baboy ug uban pang mga hayop.
Miresponde usab ang Scene of the Crime Operatives team nga gipangulohan ni Police Senior Inspector West Edquilla ug gikabutyag nga nakaangkon ang biktima og tulo ka mga samad tinigbasan -- usa sa likod nga bahin sa iyang lawas, usa sa ulo, ug usa sa tuo nga bahin sa bukton.
Nakuha usab gikan sa crime scene ang usa ka atsa nga nagkadugo nga maoy gituohang gigamit pagpatay sa biktima.
Nasayran nga adunay kauban nga trabahante ang biktima niadtong Agusto 1 kinsa nailang si Jimmy (bansagon gipugngan una), 22, ulitawo ug lumulupyo sa Palalan, Lumbia, kinsa kalit nga nahanaw sa maong dapit.
Human sa maong insidente, ang patay nga lawas gidala sa Bollozos Funeral Parlor alang sa otopsiya, samtang padayon pa ang imbestigasiyon sa kapolisan.
Gipatik sa mantalaang SuperBalita Cagayan de Oro Agosto 12, 2015.
Linkback:
https://tubagbohol.mikeligalig.com/index.php?topic=80758.0
