Ni KRIS C. SIALANA
MAAYONG pagkataop sa kutsilyo sa sampot sa usa ka lalaki human giluba sa suspetsado nga kaila ra usab niini niadtong Biyernes sa hapon sa Baloy, Tablon, sa dakbayan sa Cagayan de Oro.
Talandugon si Ronnie Torayna, 35, ulitawo nga lumulupyo sa susama nga dapit.
Sa impormasyon gikan sa tambalanan diin nadala ang biktima gibutyag sa igsuon niini nga igo lang nga nag-uban kini ngadto sa suspetsado nga naila nga si Patring, 60, sa dump truck nga naghakot og balas.
Giingong kalit lang miduol ang suspetsado kinsa lango sa ilimnong makahubog ug nagkalalis ang duruha sa wala masayri nga rason nga misangpot gayud sa pagpangdunggab.
Nakaangkon og samad dinunggaban ang biktima diha mismo sa iyang sampot hinungdan nga kritikal ang kahimtang niini.
Sa pagsulat niini nga balita nagpabilin pa nga gawasnon ang suspetsado samtang ang biktima giobserbahan pa usab sulod sa Northern Mindanao Medical Center, Cagayan de Oro.
Gipatik sa mantalaang SuperBalita Cagayan de Oro Nobiembre 22, 2015.
Linkback:
https://tubagbohol.mikeligalig.com/index.php?topic=81468.0
