2 ka estudyante gipangluba
MITUGPA sa balay tambalanan ang duha ka mga tinun-an human giluba sa laing tulo ka estudyante.
Nahitabo ang insidente alas 4:20 sa hapon niadtong Biyernes didto sa Crossing Inabanga, Kilometer 24, Bunawan, siyudad sa Davao.
Naila ang mga biktima nga sila Roel, 14, taga Buenavista, Panabo City ug Ronel, 14, taga Fatima, Inabanga, Bunawan ning dakbayan nga pulos tinun-an sa Bosque National High School sa Bunawan ning dakbayan.
Samtang mga suspek mao sila Jenmark, 17, taga Budbud, Bunawan; Junmar, 17, taga Licanan, Lasang ug Joven, 16, taga Purok 6, Buhisan, Tibungco nga pulos estudyante sab sa Al Navarro National High School sa Lasang.
Base sa blotter sa Bunawan Police Station, nasayran nga sakay ang mga suspek ug mga biktima sa usa ka dyip.
Nasayran nag gikan ang lima ka mga tinun-an Al Navarro National High School kay mitan-aw sa athletic meet sa maong eskuwelahan.
Apan pag-abot nila sa Crossing Inabanga, kalit nga gipangluba sa mga suspek ang mga biktima dayon naug sa gisakyang dyip ug dayon sibat.
Nakahiagom si Roel og samad linubaan sa tuong bukton samtang si Ronel nalubaan sab iyang likod.
Daling mihimo og follow up operations ang kapulisan, pangulohan ni Police Senior Inspector Reynaldo Capute, hepe sa Bunawan PNP nga miresulta sa pagkasikop sa tulo ka mga suspek.
Nakuha gikan sa mga tinun-an ang usa ka kutsilyo nga dunay gitas-on nga 10 ka pulgadas.
Gituohan nga ang pagpangantiyaw sa duha ka grupo sa tinun-an maoy hinungdan sa maong pagpangluba. (Blue Cordero)
Gipatik sa mantalaang SuperBalita Davao Septembre 16, 2012.
Linkback:
https://tubagbohol.mikeligalig.com/index.php?topic=54714.0
