Ni Joy F. Tumulak
Saturday, July 16, 2011
GITUSOK ug barbeque stick ang ulo sa usa ka fetus aron masumpay sa lawas sa dihang napalgan kini sa kapulisan nga gilubong sa La Guardia, sakop sa Barangay Apas, dakbayan sa Sugbo.
Nakit-an sa kapulisan nga may barbeque stick nga migimaw gikan sa lawas sa fetus nga gituyo pagbutang kay nabuwag ang ulo gikan sa lawas.
Si Oscar Avenido, 45, usa ka jeepney driver, nitug-an kanila ni PO3 Geofrey Gutual, PO3 Julius Mabunay, PO3 Victor Ayuman, PO2 Cristobal Geronimo ug PO2 Lou Pagara sa Homicide Section nga nagkawot siya sa usa ka bakante nga luna distansya sa iyang gipuy-an aron ilubong ang namatay nga iro.
Apan samtang nagkawot, naigo sa iyang pala ang usa ka garapon ilawom sa yuta ug sa iyang pagtan-aw usa kini ka fetus.
Daling niresponde ang kapulisan ug nadiskubrehan ang fetus nga gisulod og garapon nga adunay nakabaat nga tape sa tabon sa garapon.
Ang garapon gituohan nga may sulod nga formalin nga maoy gihumolan sa maong fetus.
“Nakita namo ang barbeque stick kay nabuwag na man ang ulo sa lawas. Ang barbeque stick migimaw nga gitusok sa lawas sa fetus,†matod pa ni Gutual.
Gipatik sa mantalaang SuperBalita Cebu Hulyo 17, 2011. Linkback:
https://tubagbohol.mikeligalig.com/index.php?topic=42280.0
