Nila ni Ma. Gladys Alterado, Homer R. Montesclaros ug Monnahlie G.Olandria, SWU (Banat)
Duha ka babaye ang nawad-an og dul-ang P200,000 nga gisakiyo sa mga kiriwan sa managlahing lugar dinhi sa Metro Cebu sa miaging adlaw.
Ang mga biktima mao sila si Sheila Mae Yao, 29, nga taga Deca Homes sa barangay Tungkil, lungsod sa Minglanilla, ug Lady Shen Miñoza , hingkod, minyo nga taga sitio Pulang Bato, barangay Pit-os ning dakbayan sa Sugbo.
Si Yao nawad-an sa iyang P158,000 dihang ang bag nga iyang gisudlan niini gibilin niya sa iyang sakyanan.
Kini samtang nakighusay siya sa drayber sa laing sakyanan nga midumbol sa iyang kotse didto sa atubangan sa Lovely Home Subdivision sa barangay Mohon, dakbayan sa Talisay sa miaging buntag.
Iyang gitug-an ngadto sa kapolisan, nga sa pagbalik pa niya nahanaw na ang iyang bag diha sa lingkoranan sa iyang sakyanan.
Gawas sa kuwarta, didto usab sa maong bag ang iyang ATM card ug uban pang mga papeles.
Samtang si Miñoza bag-o lang nag-withdraw og P35,000 gikan sa bangko, sa miaging hapon, dihang samtang naglakaw siya sa Urgello Street, barangay Sambag I, ning dakbayan sa Sugbo, kalit lang gihunongan siya sa usa ka yellow nga motorsiklo unya gilabni ang iyang bag nga gisudlan sa kuwarta sa nagsakay nga wala hiilhi sa maong motor, dayong sirit niini pahilayo sa maong lugar. Sa pagkakaron gipangita pa sa kapolisan ang mga k******n.
Linkback:
https://tubagbohol.mikeligalig.com/index.php?topic=35180.0
