Ni Stephanie Viovicente-Berganio
Tuesday, April 3, 2012
PATAY ang ex-marine atol mismo sa anibersaryo sa mga New People’s Army (NPA) niadtong nilabay’ng adlaw sa Barangay Gaston, lungsod sa Lagonglong, Misamis Oriental.
Giila ang biktima nga mao si Gilbert C. Sambrano, 55, minyo, residente sa susamang dapit.
Si Police Senior Inspector Reynaldo Sandigan kinsa hepe sa Lagonglong Police Station nga nainterbyu sa Sun.Star SuperBalita niingon nga nahitabo ang insidente dihang pauli na ang biktima sa iyang puloy-anan mga alas 6:00 sa buntag.
Gituohang daan na nga miplastar ang duha ka mga armadong lalaki gawas sa puloy-anan sa biktima ug saktong pag-abot niini deretso kining girakrakan gamit ang M16 armalite ug kalibre 45.
Siyam ka mga samad pinusilan ang naangkon sa biktima nga maoy hinungdan sa iyang kamatayon. Samtang yano lamang dayon nga nanglakaw ang suspek paingon sa wala matinong direksyon.
Girespondehan sa Lagonglong Police Station ang hitabo ug nahipos ang lima ka basyo sa MI6 ug laing basyo sa kalibre 45.
Dako ang pagduda ni Sandigan nga hinimoan kini sa mga sakop sa NPA sa area diin duha ang gituohang motibo, pagdumot o agaw-armas. Labaw sa tanan ang high power nga mga armas kasagaran gipanag-iya sa maong grupo.
Pagdumot tungod kay giingong daghan sa mga residente sa dapit ang nagreklamo sa ka-estrikto niini ug walay kahadlok nga kalit lang magpabuto sa iyang mga armas nga itumong ngadto sa iyang mga silingan.
Gani ang mga silingan mismo ang niingon nga walay ilang maayo nga relasyon ngadto sa biktima tungod sa giingong kaabusado niini sa dapit.
Taod-taod na kining bulag sa iyang asawa ug nag-atiman sa iyang farm. Migawas usab ang taho nga dili maayo ang pagtratar niini sa iyang mga katabang sa umahan.
Ang kaso padayon pang giimbestigahan sa pagsulat ning balita human ang nag-inusarang witness daw aduna pay kahadlok sa pagsulti sa iyang nakita.
Gipatik sa mantalaang SuperBalita Cagayan de Oro Abril 04, 2012.
Linkback:
https://tubagbohol.mikeligalig.com/index.php?topic=49038.0
