Ni Jojo Ugdol (Banat) | Updated March 7, 2016 - 12:00am
CEBU, Philippines - Patay ang usa ka ex-convict human kini gipusil samtang paingon pauli sa ilang balay diha sa Brgy. Bonbon sa Lungsod sa Aloguinsan sa nakalabay nga gabii.
Giila ang biktima nga si Rodelio Nengasca, 45, nagpuyo sa maong lugar.
Ang desk officer sa Aloguinsan Police nga si Police Officer 3 Solomon Cardoza nga nahinabi sa Banat News nagkanayon nga gikan nakigtagay ug nagkanta-kanta sa Poblacion ang biktima.
Si Cardoza miingon nga gikan sa kalsada molakaw pa ang biktima og 800 metros una pa kini maabot sa ilang balay.
Sumala pa nga human nakanaog sa habal-habal ang biktima ug nakabiya na og pipila ka metros ang drayber sa motorsiklo nakadungog kini og duha ka buto sa armas.
Sa pagsubay balik sa drayber nakita na lang niini ang biktima nga nahagba na sa kalsada ug nagkadugo.
Gitabang ug gidala sa Pinamungajan District Hospital ang biktima apan gideklarar kini nakabsan gayod sa kinabuhi.
Sumala pa ni Cardoza nga kanhi priso sa National Bilibid Prison sa Muntinlupa ang biktima tungod sa kasong murder ug giingong pirme kining ireklamo sa iyang mga silingan diha sa barangay kay maldito.
Nagduda si Cardoza nga posibleng adunay nasilo sa biktima ug gibawsan kini sa iyang mga nakabikil.
Duha ka samad pinusilan sa dughan ang naangkon sa biktima gamit ang wala pa matino nga kalibre sa armas. (BANAT NEWS)
Linkback:
https://tubagbohol.mikeligalig.com/index.php?topic=82000.0
