Ni JEEPY P. COMPIO
MIDANGOP sa buhatan sa San Pedro Police Station sa Davao City ang usa ka opisyal sa gobyerno human giingnan nga guwapa pa ang iro kaniya.
Alas 6:20 sa gabii, niadtong Huwebes, mipatim-aw sa presinto dos ang usa ka alyas Ana (bansagon gitago), 50, usa ka administrative assistant sa usa ka lokal nga buhatan sa siyudad ug nagpuyo sa NHA Agdao.
Giingon nga alas 5:00 sa hapon, misulod siya sa usa ka Beauty Salon sa dalang Claro M. Recto aron magpa-foot spa, apan sa iyang pagsulod gipaghot siya sa iro sa tag-iya sa salon.
Misulod gihapon siya ug milingkod dihang giingnan siya sa usa ka alyas Albert nga di manghilabot ang iro. Apan padayon nga mipaghot ang iro kaniya.
Migawas na lang siya sa salon ug gikanselar ang iyang pagpa-booking sa serbisyo.
Apan sa iyang paggawas, giingnan siya ni alyas Albert, "Ay, Madam, mas guwapa pa akong iro sa imoha," butang nga gikahiubos sa reklamante.
Tungod niini, mipatala na lang ang empleyada sa presinto sa pulis kinsa nahiubos human siya giingnan nga guwapa pa ang iro kaniya.
Ang kaso anaa na gisang-at sa barangay lebel aron didto sila husayon kon ugaling ipatawag sa empleyada ang tagdumala sa salon.
Gipatik sa mantalaang SuperBalita Davao Septembre 26, 2015.
Linkback:
https://tubagbohol.mikeligalig.com/index.php?topic=81048.0
