Nila ni Brenda D. Batuto ug Ria Mae Y. Booc sa The Freeman (Banat) Updated January 23, 2012 12:00 AM
CEBU, Philippines - Usa ka k******n ang nanghagad og phone sex sa tag-iya sa iyang gikawat nga cellphone bugti sa pag-uli niya sa mga butang nga iyang gikawat.
Ang insidente nahitabo kagahapon sa buntag diha sa Quiapo Compound, barangay Cansaga, lungsod sa Consolacion diin usa ka Lovely Cel Negapatan, 23, residente sa maong dapit ang midangop sa kapolisan kabahin sa maong hitabo. Ang biktima mibutyag ngadto sa kapolisan nga ang suspetsado nga nagpailang silingan ra sa biktima nagkanayon nga iuli ra niya ang mga kinawat niyang gamit kung makig-phone sex kini kaniya.
Ang mga nadala sa k******n mao ang tulo ka ATM cards nga dunay sulod nga P30 mil; passbook sa bangko nga dunay sulod nga P120 mil, pitakang dunay sulod nga P10 mil ug cellular phone.
Si PO1 Harley Itang sa Consolacion Police Station nagkanayon nga ang amahan na sa biktima ang nakabantay kagahapon sa alas 7:00 sa buntag human kini migawas gikan sa banyo nga nawagtang na ang mga nahisgutang butang diha sa lamesa sa ilang sala.
Gidudahan nga ang k******n diha miagi sa pultahan sa ilang kusina tungod kay abli na kini. Nianang mga alas 7:30 sa buntag ang k******n mitawag sa mga numero sa cellphone sa dalaga ug mihagad sa maong kondisyones.
Nagtuo si Itang nga dugay nang naibog sa biktima ang k******n apan ang biktima wala makaila niini. (BANAT NEWS)
Linkback:
https://tubagbohol.mikeligalig.com/index.php?topic=46270.0
