Ni Romeo T. Limpangog (Banat)
Higpit nga gidid-an ang mga garbage collector sa dakbayan sa Mandaue sa pagpangayo og pinaskohan gikan sa publiko.
Si Engineer Henry Ceniza , ang hepe sa General Services Office (GSO) sa maong dakbayan atol sa press conference mibutyag nga dili angayang mangayo ang mga basurero og pinaskohan aron dili masaypan nga nangilkil sila sa katawhan.
Matud pa ni Ceniza nga ang mga garbage collector nga masakpan nga mangayo og unsa mang butang gikan sa katawhan ning panahon sa Pasko mapahamtangan og silot nga pagkasuspenso o pagkalagpot sa trabaho.
Gani giawhag ni Ceniza ang katawhan sa pagtaho sa iyang buhatan kutob sa mga basurero nga mangayo og kuwarta o unsa mang matang pinaskohan gikan kanila. Hinuon iyang gitataw nga dili nila did-an ang mga tigkolekta sa basura sa pagdawat og pinaskohan kun boluntaryo kining gihatag kanila ug wala nila pangayoa.
Linkback:
https://tubagbohol.mikeligalig.com/index.php?topic=35181.0
