Ni Philip A. Cerojano
Sunday, August 21, 2011
USA ka ex-convict nga bayut nakuhaan og gatusan ka aluminum foil nga gipaslak sa iyang sampot atol sa pagbisita sa New City Jail Male Dormitory sa Barangay Kalunasan, dakbayan sa Sugbo kagahapon, alas 9:45 sa buntag.
Si Alex Jimenez, 29, kanhi nakombikto sa kasong pagpangawat ug nakagawas lang niadtong August 9 human sa iyang sentensiya, niduaw sa usa ka Kristino Cortez kagahapon dihang dunay namatikdan ang jail officers.
Si Jail Insp. Manuel De la Peña, deputy warden for operation, nagkanayon nga nitingog ang metal detector sa entrance dihang nisud si Jimenez.
Pagsusi nila, aduna kini dalang lighter ug sa ilang pagdala sa male search room didto ilang nasuta nga adunay butang nga nag-ungot sa lubot sa suspek.
Gipadayag ni De la Peña nga ilang gipugos sa pagpagawas sa iyang hugaw aron molugwa ang ilang gidudahang gipasok sa sampot ug positibo nga nilugwa ang 330 ka aluminum foil nga dangaw ang gitas-on.
Tungod sa kahugaw, ang awtoridad nigamit og gwantis aron pag-ihap sa linukot nga butang nga gamiton alang sa pagsuyop og shabu.
Ang deputy warden for operation sa City Jail nagduda nga gisuholan lang ang suspetsado aron sa pagpalusot sa maong drug paraphernalia.
Si Jimenez gikatakdang i-turn-over sa Guadalupe Police Station alang sa pormal nga pagpasaka og kaso nga kalapasan sa Article 2, section 12 sa Republic Act 9165, pasabot ni De la Peña. --Gipatik sa mantalaang SuperBalita Cebu Agosto 22, 2011.
Linkback:
https://tubagbohol.mikeligalig.com/index.php?topic=43074.0
