Saturday, September 15, 2012
USA ka doktor mitugpa sa iyang tambalanang gitrabahoan human gibunalan sa wa mailhing mga lalaki alas 10:30 sa buntag kagahapon didto sa GMA Compound sa JP Laurel Avenue, siyudad sa Davao.
Base sa blotter sa Sta. Ana Police Station, ang biktima mao si Francis Ryan Gonzales Laganson, 26, ulitawo, resident doctor sa Southern Philippines Medical Center.
Ang biktima lumad nga taga Tagum City ug kasamtangan nga nagpuyo sa GMA Compound, JP Laurel Avenue.
Nasayran nga nahitabo ang insidente samtang naglakaw ang biktima paingon sa iyang giabangan nga apartment.
Gisundan siya sa duha ka lalaki kinsa patraydor nga mibunal kaniya og puthaw makadaghan nga higayon sa kalawasan sa biktima.
Human sa hitabo, suma sa report, daling misibat ang mga lalaki paingon sa wala masayri nga direksiyon.
Ang biktima daling gidala sa SPMC diin padayong giobserbahan kagahapon ang iyang kahimtang ni Dr. Abundo.
Gibisita sa Sun.Star Davao Superbalita ang buhantan ni Dr. Leopoldo Vega, hepe sa SPMC, aron pakisayran sa maong hitabo apan giingon nga tua siya sa kaulohang Manila.
Duna say meeting nga giatiman si SPMC administrative officer Ricardo Jostol.
Dunay nagduda nga basin dunay nasuko nga kabanay sa mga pasyente sa biktima mao nga buot siyang patyon.
Sa pagsuwat ning balita, padayong gisusi karon sa kapulisan aron mailhan ug masikop ang mga responsable.
Gipatik sa mantalaang SuperBalita Davao Septembre 16, 2012.
Linkback:
https://tubagbohol.mikeligalig.com/index.php?topic=54674.0
