Ni Lesley Caminade-Vestil/eim (Banat) Updated August 07, 2011 12:00 AM
CEBU, Philippines - Patay ang usa ka dispatser human gipusil sa usa sa tulo ka mamumuno pasado alas-4 kagahapon sa hapon sa dalan A. Soriano barangay Carreta ning dakbayan.
Ang biktima nailhan nga si Pablito Ybañez, 32, dispatser ug molupyo sa sitio San Roque sa barangay Mabolo ning dakbayan nga nakaangkon og samad pinusilan sa iyang kalawasan.
Sa pakighinabi sa Banat News ni SPO4 Alex Dacua, sa Homicide Section sa Cebu City Police Office, ang drayber sa jeepney mibutyag nga mikapyot ang biktima uban sa mga higala niini sa iyang sakyanan.
Apan sa kalit lang laing tulo ka mga lalaki ang mikapyot usab ug pag-abot sa may North Reclamation Area kalit gipusil makadaghang higayon sa usa sa bag-ohay lang mikapyot ang biktima.
Human sa pagpamusil ang tulo ka wala mailhing lalaki miambak ug mikaratil og dagan palayo sa maong lugar. Ang biktima natagak gikan sa sakyanan ug gidali og tabang ug gidala sa Cebu City Medical Center (CCMC) diin gideklar kini nga dead on arrival.
Ang kapolisan nakakuha og upat ka kabhang sa kalibre .45 sa crime scene. Nagduda si Dacua nga atraso ang motibo sa maong krimen. - (BANAT NEWS)
Linkback:
https://tubagbohol.mikeligalig.com/index.php?topic=42752.0