MikeLigalig.com

LEKSIYON alang sa ilegal nga mananagat.

Usa ka 31-anyos nga mananagat ang namatay dihang nibuto sa iyang walang kamot ang dinamita ug wa niya malabay sa dagat sa Barangay Sonog, lungsod sa San Francisco, isla sa Camotes.

Giila sa kapulisan sa San Francisco ang namatay nga si Dionisio Gomez Bensig Jr., 31, molupyo sa samang barangay ug wa pa matino sa kapulisan kon minyo kini.

Samtang, ang kauban sa biktima nga si Lito Avila nakaangkon og seryusong samad sa nagkalainlaing bahin sa lawas ug nagpaalim sa iyang mga samad sulod sa usa ka ospital.

Si PO3 Jose Florentino, imbestigador sa kapulisan, niingon nga si Bensig bag-o lang nanagat gamit ang dinamita.

“Bag-o ra daw to nagpraktis, dili to siya beterano,” matod ni Florentino nga nahinabi sa Sun.Star Cebu.
“Ang mga beterano gipangbantayan na man sa taga barangay," dason niya.

Matod sa kapulisan, walay laing mga mananagat sa dapit atol sa hitabo ug nasayran na lang kini sa uban dihang nakabati sa kusog nga pagbuto sa dinamita.

Si Florentino nagkanayon nga ang fuse sa dinamita ni Bensig posible nga na-short hinungdan sa iyang daling pagbuto.

Sa imbestigasyon, nagpakita nga sila si Avila ug Bensig nanagat sa kadagatan sa Sonog gamit lang ang sakayan niadtong Biyernes, alas 2:30 sa hapon.

Si Bensig maoy nidagkot sa dinamita.

Linkback: https://tubagbohol.mikeligalig.com/index.php?topic=82325.0