Ni Romeo T. Limpangog ug Jojo Ugdol (Banat) | Updated March 7, 2016 - 12:00am
CEBU, Philippines - Nahunong og pipila ka gutlo ang gipahigayon nga Santos nga Misa ni Padre Benjamin Cortes diha sa National Shrine of Saint Joseph sa alas- 4 kagahapon sa kaadlawon sa dihang usa ka 29-anyos nga inahan kalit lang midunggab sa 5-anyos niini nga anak atubangan sa altar dungan ang pagsinggit og “mga ungo kami.â€
Si Police Officer 1 Juliet Trogo sa Women’s Desk Section sa Police Station 1 sa Mandaue City Police Office (MCPO) mitug-an nga nakaangkon gyud og upat ka mga samad dinunggaban sa iyang lawas ang bata gamit ang buak nga botelya.
Ang guwardiya sa maong simbahan ug ang pipila ka mga nanimba nga mga lalaki dali nga mitabang sa bata.
“Naglingkod na sila sa tunga-tunga, while si Father Benjamin Cortes nagmisa, nikalit lang og singgit ang inahan nga “Ongo Mi†kadaghan dayon dunggab sa iyang anak nga kuyog niya’g simba,†matud pa ni Trogo.
“Murag nagda ni daan kay wala may buak nga botilya didto,†matud pa ni Trogo.
Ang inahan sa bata gihulagway sa mga tawo daw nawad-an sa maayong pangisip nianang tungora ug gidakop sa mirespondeng mga polis samtang kini niuban sa pagdala sa iyang anak sa Mandaue City Hospital.
Ang manag-inahan lumad nga taga Bohol apan kasamtangan nga nagpuyo sa Brgy. Cambaro, Dakbayan sa Mandaue. Sumala pa ni Trogo, ang kapuyo sa suspek nga usa ka panadero mikompirmar sa kapolisan nga wala sa maayong pangisip ang inahan sa iyang anak. Nagplano naman unta kini nga dad-on ang kapuyo sa tambalanan kay molikoy na ang hunahuna.
Si Trogo miingon nga ilang gipadala sa Vicente Sotto Memorial Medical Center diin mahimutang ang Center for Behavioral Science ang ginang aron masusi ang tinud-anay nga kahimtang sa pangutok niini. (BANAT NEWS)
Linkback:
https://tubagbohol.mikeligalig.com/index.php?topic=82001.0
