Ni Dennes R. Tabar
SAKOP sa Philippine Air Force (PAF) ang gitanggong human gipasanginlan nga nilugos ug nibilanggo sa usa ka menor de edad nga babaye sulod sa iyang gipuy-an.
Kasamtangan nga gibalhug sa military stockade sa Mactan Benito Ebuen Air Base sa Lapu-Lapu City si A1C Marlo Reyna-Bocog, 36, ulitawo.
Siya unang gibilanggo sa holding cell sa Lapu-Lapu City Police Office sa wa pa gi-custody sa mga opisyal sa PAF alang sa administratibong imbestigasyon.
Base sa initial nga impormasyon sa Police Station 4 (Marigondon Police) diin unang gidala ang suspek, nga niadtong Oktubre 30, gisaulog ni Bocog ang iyang adlaw’ng natawhan sa iyang gipuy-an Brookfields subdivision, Barangay Basak, ning dakbayan.
Asoy pa ni P/Insp. Juan Capacio, hepe sa Station 4, nga ang higala ni Bocog nga naila lang sa ngalan nga Lester maoy giingong ka-textmate sa menor de edad nga biktima.
Gikuyog ni Lester ang 15 anyos nga babaye, kinsa graduating sa high school, sa balay ni Bocog sanglit imbitado man kini sa maong kasaulogan.
“Matod pa sa biktima nga nag-inom pa sila didto. Unya nipauli ang iyang amigo (Lester),†matod ni Capacio.
Sigun sa pamahayag sa biktima nga taga Barangay Pusok nga mga alas 10:00 o alas 11:00 sa gabii, gidala siya sa suspek sulod sa kuwarto.
Giingong ang pikas lawak adunay laing babaye nga natulog nga matod pa uyab sa suspek.
“Gihuboan kuno siya tanan (sapot) dayon gihilabtan siya sa sundawo,†hulagway ni Capacio sa gibutyag sa biktima kanila.
Saysay ni P01 Marites Alsola, Women’s and Children’s Desk sa Police Station 4, nga nisuway og sukol ang biktima apan wa siyay nahimo sa dihang gitionan siya ni Bocog sa wa pa matino nga kalibre nga armas.
Naabtan pa siya og Nobiyembre 1 sulod sa balay sa suspek una naluwas sa mga sakop sa Special Weapon and Tactic (SWAT) team.
Matod sa biktima nga gi-detain siya ni Bocog sulod sa usa ug tunga sa adlaw diha sa lawak.
Naluwas ang biktima niadtong Nobiyembre 1 sa dihang nakahigayon siya og gamit sa cellular phone nga gibiyaan sa suspek samtang kini naligo.
Pulong pa ni Capacio nga nakahigayon og text ang biktima sa iyang amiga ug ang amiga mao nay nipahibawo sa inahan sa biktima, kinsa dali nga nakapangayo og police assistance.
Nianang pasado alas 3 sa hapon nasikop ang sundawo ug naluwas ang biktima sa dihang gisulong sa Swat team ang balay ni Bocog.
Ang biktima gidala sa Pink Room sa Vicente Sotto Memorial Medical Center aron sa paghiling kon positibo ba nga nalugos.
Kasamtangan nga gipaabot ang resulta niini.
Apan ang mga tinugyanan sa PAF kasamtangan nga ningkuha kang Bocog sa detention cell sa LLCPO niadtong Nobiyembre 2 sa alas 4:05 sa hapon.
“Base sa military rules naa pud silay procedure nga gi-follow. While waiting sa criminal complaint nga among (police) i-file, mihimo sad sila (PAF) og investigation sa administrative aspect,†pasabot ni PSSupt. Rey Lyndon Lawas.
Si Bocog kasamtangan nga gipaubos sa kustodiya sa PAF.
Linkback:
https://tubagbohol.mikeligalig.com/index.php?topic=56530.0
