Ni Jeepy P. Compio
Sun Star
DAVAO CITY - Gidali pagdala sa Southern Philippines Medical Center (SPMC) ang usa ka kinse anyos nga dalagita human matulon ang aritos nga gitaod sa dila alas 3:00 sa kaadlawon niadtong Biyernes.
Giila ang dalagita nga si Lalaine Joyce, (bansagon gitago), molupyo sa dalang R. Castillo, Barangay San Antonio, Agdao District ning siyudad.
Subay sa rekord sa ospital, nasayran nga sa wala pa mahitabo ang insidente, nakita na sa inahan sa biktima nga si Jingky nga gitaod sa anak ang aritos sa iyang dila. Busa nasuko ang inahan ug gibadlong ang anak nga kuhaon kini kay basin ug matulon ug matitanos siya.
Apan si Joyce nagmagahi nga tanggalon ang gitaod nga ariyos sa iyang dila.
Dako na lang ang katingala sa inahan kay mireklamo na ang anak nga mihapdos ang iyang tilaok ug mitug-an nga natulon niya ang ariyos samtang naglad-ok ug laway samtang natulog.
Nasayran nga wala diay ma-lock sa dalagita ang gitaod niyang aritos sa iyang dila hinungdan nga natulon.
Gidala dayon sa ospital ang biktima ug gi-x-ray. Didto nakita nga ang ariyos naa sa iyang tinai.
Wala na hinuon makabatyag ug pagpanakit sa tiyan ang biktima ug hulaton na lamang niya nga mogawas kini pinaagi sa iyang hugaw.
Apan suma sa mga doktor sa ospital nga kung di mogawas ang maong butang sud sa unom ka adlaw, operahan siya.
Alas 11:15 kagahapon sa buntag, Sabado, nasayran sa tigsuwat nga wala na ang pasyente sud sa ospital ug suma sa mga guwardiya miuli na siya.
Wa pa sab masayri kung nigawas na ba ang aritos sud sa iyang tinai.
Linkback:
https://tubagbohol.mikeligalig.com/index.php?topic=73319.0
