Saturday, February 26, 2011
PATAY nang midangat sa tambalanan ang usa ka lalaki human siya gipusil sa wa mailhing mamumuno samtang naghigda sa sofa sud sa balay sa iyang higala sa 8:55 sa gabii niadtong Biyernes.
Ang insidente nahitabo didto sa Durian Village, Barangay Calinan Proper, siyudad sa Davao, sigun ni PO3 Rimel Serado sa Calinan Police Station.
Si Serado nagbutyag nga ang biktima mao si Jojo Dalangin, 32, minyo, nagpuyo sa Campo 3, Barangay Talomo River, distrito sa Calinan, ning siyudad.
Nasayran nga malinawon kaayong naghigda ang biktima sa sofa sa pamilyang Capol, apan kalit miabot ang wa mailhing suspetsado gipusil siya tumong sa ulo.
Si Dalangin gisuwayan pagdala sa iyang kabanay sa Isaac Robillo Hospital apan gideklara ni Dr. Reden Bersaldo nga dead on arrival na ang biktima sa maong hospital.
Mga nakasaksi nagbutyag nga human sa pagpamusil, daling mibiya ang mga suspek sakay sa usa ka XRM nga kolor itom ug pula nga gimaneho sa wa pa mailhi nga lalaki.
Ang patay nga lawas sa biktima atua karon gihaya sa St. Peter Funeral Homes samtang ang kapulisan padayong nag-imbestiga sa maong hitabo. (Alger Dura)
Gipatik sa mantalaang SuperBalita Davao Pebrero 27, 2011. Linkback:
https://tubagbohol.mikeligalig.com/index.php?topic=38352.0
