Nasunog ang lawas sa usa ka ulitawo human siya nakuryentihan sa alas 6:20 sa hapon niadtong Lunes didto sa probinsiya sa Cotabato.
Giila ang biktima nga mao si John Klin Ynion, 19, ug molupyo sa Barangay Tubon, Pigcawayan sa maong probinsiya.
Si Chief Inspector Abello Jungaya, hepe sa kapulisan sa Pigcawayan, nagsulti nga naglakaw lang ang biktima gikan sa iyang pinuy-anan paingon sa usa ka tindahan aron mopalit og sigarilyo. Apan wala niya mamatikdi ug natumban niya ang live wire gikan sa poste sa Cotabato Electric Cooperative (Cotelco) nga natumba gumikan sa makusog nga hangin ug ulan.
Patay gilayon si Ynion sa kakusog sa boltahe sa kuryente nga iyang natamakan. Dunay mga tawo duol sa nahitaboan apan nahadlok nga luwason ang biktima sa diha nga ilang nakita ang nag-aso-aso ug nagkalayo nga linya sa kuryente.
Andam sab nga mopasaka og kaso ang pamilya sa biktima batok sa Cotelco gumikan kay wala dayon milihok bisan kon gipahibawo na sa mga barangay opisyal nga dunay natumba nga poste. - Sun Star
Linkback:
https://tubagbohol.mikeligalig.com/index.php?topic=32522.0
