MikeLigalig.com

Ni Romeo T. Limpangog/WC (Banat) Updated May 19, 2011 12:00 AM


CEBU, Philippines -  Si Mayor Jonas Cortes sa dakbayan sa Mandaue dili na gustong tawgong halangdon o honorable.

Matud pa sa mayor nga mas pabor siya nga tawgon sa yanong titulo nga mayor kay sa honorable.

Busa sa mga dokumento nga pirmahanan, dili na gusto ang mayor sa dakbayan sa Mandaue nga pakapinan pa og honorable ang iyang titulo kay alang kaniya usa siya ka suloguon ug dili hari.

Lahi si Cortes sa ubang mga opisyal sa gobyerno kansang garbo lapaw kaayo sa ilang masarangan nga mawad-an na hinuon og respeto ang katawhan tungod sa kahambugero sa ilang kaugalingon.

Matud pa sa mayor nga hilasan siyang maminaw kun ang mga magbubuhis o mga tawong iyang giserbisyohan mao na hinuon ang mura og ubos kaayo nga kun hunahunaon, sila maoy agawon sa mga nanerbisyo sa gobyerno kay buhis nila ang gisuhol sa mga kawani sa kagamhanan.

Matud pa sa mayor nga gusto niyang balikon ang iyang naandang suroy-suroy sa kabarangayan diin mahimamat niya ang mga molupyo sa matag lugar. Unya pinaagi niini hisayran usab niya ang ilang mga problema ug nag-unang panginahanglan sa katawhan sa barangay.

Hinuon nagtuo siya nga dili gyud tanang problema diha-diha kahatagan niya og kasulbaran, apan mas bubintaha nga masayran niya kini sa personal niyang pagsil-ing sa katawhan.

Alang kaniya mahinungdanon kaayo nga siya mismo maoy makasaksi sa mga nag-unang panginahanglan sa matag barangay. (BANAT NEWS) 



Linkback: https://tubagbohol.mikeligalig.com/index.php?topic=40875.0