Simbahan nabalaka sa mga suicide
Ni Sheila C. Gravinez
Thursday, January 20, 2011
NABALAKA ang simbahang Katoliko sa Sugbo sa sunod-sunod nga mga kaso sa hikog dinhi sa Sugbo sud lang sa duha ka semana.
Matod ni Msgr. Achilles Dakay, tigpamaba sa Artsdyosesis sa Sugbo, nga nagpakita lang kini nga daghan nang mga tawo ang nahilayo sa Ginoo ug nawagtangan na og pagsalig ngadto kaniya.
Si Dakay nga nahinabi sa Sun.Star Superbalita kagahapon nipadayag nga angay pang pahugtan sa mga tawo ang ilang pag-ampo sa Ginoo ug likayan nga magpadala sa mga temptasyon sa pagkutlo sa kinabuhi.
Iyang gipahinumdum nga ang Ginoo lang ang adunay katungod nga mokutlo og kinabuhi sa usa ka tawo isip maoy naghimo niini ug “author of lifeâ€.
Samtang si Msgr. Esteban Binghay, Episcopal vicar sa Archdiocese of Cebu nagkanayon nga kinahanglan unta magbaton og “support system†ang matag usa kanato.
Aron sa higayon nga duna kita’y mga problema, modangop kita sa usag-usa ug ipadayon ang hugot nga pagtuo ug pagsalig sa Labaw’ng Makagagahum.
Suma pa niya kinahanglan nga duna kitay mga higala nga andam maminaw sa mga problema.
Iyang gidugang nga isip mga higala, mamati ug mosabot unta kita sa mga tawo nga mosumbong sa ilang mga problema bisan og di kita motambag.
Siya nagtuo nga pinaagi sa pagpaminaw sa mga tawo nga problemado mapagaan ang ilang gibati ug makalimot sa ilang mga problema.
Tambag niya sa mga tawo nga problemado nga likayan ang mag-inusara sanglit sa maong higayon makahunahuna kini pagbuhat og dautan.
“We don’t own our lives. Dili ta mag-unauna kay ang Ginoo ra ang magbuot nato. God has his own time kanus-a kuhaon ang atong kinabuhi, padayag ni Binghay dihang nahinabi sa Sun.Star Superbalita kagahapon.
Niadtong Lunes usa ka pulis ang naghikog pinaagi sa pagpusil sa iyang kaugalingon gumikan sa giingong problema sa kaminyuon.
Nasundan pa kini og laing insidente sa suway nga paghikog diin usa ka lalake ang nilayat sa skywalk sa dakbayan sa Sugbo gumikan kay giingon nga wa makabayad sa iyang utang sa newspaper dealer samtang usa ka trabahante usab ang nilayat sa karaang taytayan sa Mactan-Mandaue bridge tungod usab sa problema.
Gipatik sa mantalaang SuperBalita Cebu Enero 21, 2011.Linkback:
https://tubagbohol.mikeligalig.com/index.php?topic=36808.0
