Ni Dennes R. Tabar
Sunday, June 26, 2011
CEBUANA nga giingong lider sa mga rebeldeng komunista o giilang amazona nga naglihok didto sa isla sa Negros ang nag-atubang og laing duha ka mga kaso.
Usa ka Marilyn Badayos ang nasikop sulod sa usa ka pension house sa siyudad sa Bacolod gamit ang warrant of arrest tungod sa kasong rebellion.
Atol sa pagsikop, aduna pa kini samad sa iyang kamot agi sa pinusilan ug iya kining nakuha atol sa labing uwahing engku-wentro tali sa iyang mga sakop ug sa military.
Si Badayos sa pagkakaron ubos na sa custody sa Negros Oriental Police Office (NOPO).
Apan nasayran nga si Badayos nag-atubang og laing duha ka mga kaso may kalabotan sa kasong murder nga gi-isyu ni Judge Henry Arles sa RTC Branch-6 ug laing kasong rebellion nga gi-isyu ni Judge Rosencio Bandal sa RTC- Branch-7 sa Guihulngan, Negros Oriental.
Ang pangulo sa 302nd Brigade nga si Col. Manuel Ochotorena niingon nga ilang abagahon ang gasto sa tambalanan diin gipatambalan si Badayos tungod sa samad niini sa kamot nga ilang gihulagway nga na-infected ug nalungag.
Sa dihang gipangutana si Badayos kon naunsa ang iyang bukton, igo lang kining nisulti ngadto sa mga militar nga nidakop kaniya nga siya nadisgrasya sa usa ka motorsiklo.
Ang militar gikatakda nga mohimo og dugang imbestigasyon ni Badayos.
Gipatik sa mantalaang SuperBalita Cebu Hunyo 27, 2011. Linkback:
https://tubagbohol.mikeligalig.com/index.php?topic=41945.0
