CPPO nagkandila, naglampara kay giputlan sa Veco
Ni Guam P. Logroño
Tuesday, March 15, 2011
LAMPARA, kandila ug flashlight na lang ang gigamit sa mga pulis nga nag-duty sa headquarters sa Cebu Provincial Police Office (CPPO) human giputlan sa kuryente sa Visayan Electric Company (Veco) kagahapon sa hapon.
Ang notice of disconnection niadto pang Biyernes nadawat sa CPPO ug giimplimentar gilayon kagahapong adlawa kay wa mabayri ang kapin sa P300,000 nga bill.
Si Sr. Supt. Louie Oppus, deputy regional director for operations (DRDO) sa Police Regional Office (PRO-7) nga nahinabi sa Sun.Star Superbalita, nagkanayon nga mokabat sa P386,000 ang bayranan sa kuryente sulod sa usa ka tuig.
Hinuon iyang giklaro nga sa iyang level isip DRDO ilang gipaningkamutan nga ma-settle ang maong bayranan.
Gani nakig-estorya na siya sa ilang finance officer labot niini.
Giklaro niya nga dako kini og epekto sa serbisyo sa CPPO sa katawhan sa probinsya sanglit maapektuhan gyud ang ilang operation hinungdan nga sa madaling panahon mabayran ang electric bill.
Gika-estorya na hinuon niya si Sr. Supt. Patrocinio Comendador, bag-ong gitudlong hepe sa CPPO, nga paningkamutan niya nga mahatagag sulosyon ang maong problima.
Nagpasalamat usab siya nga nahatagag kahigayunan nga nakalingkod sa isip officer-in-charge (OIC) sa CPPO dul-an usa ka buwan.
Samtang usa ka police nga nadestino sa headquarter sa Sun.Star Superbalita nga wa magpaila nagkanayon nga ilang gipangkamutan kagahapong adlawa nga makapadayon sa ilang trabaho sa opisina.
Gani nag-andam na sila og flashlights ingon man suga sa ilang cell phones, mga kandila, lampara ug uban pa basta naay ikasuga sa kampo.
Gipatik sa mantalaang SuperBalita Cebu Marso 15, 2011.
Linkback:
https://tubagbohol.mikeligalig.com/index.php?topic=39023.0
