WAY kabutangan sa kasuko sa usa ka professor nga mister human iyang naaktuhan nga mikanaug ang iyang asawa gikan sa usa ka Montero Sports nga sakyanan nga gihalokan sa batan-on nga nag-drayb niini alas syete sa gabii niadtong Huwebes.
Sa maong takna, gidala sa professor nga si alyas Richard, 45, taga Barangay Duterte, Agdao District, siyudad sa Davao, ang iyang misis nga si Marissa, 39, didto sa buhatan sa Women and Children's Protection Desk (WCPD) sa Sta. Ana Police Station.
Sa pagpanubay sa Sun.Star SuperBalita sa WCPD kagahapon, gibutyag sa mga naka-duty nga pulis nga wa na madala sa mister ang giingong driver sa Montero Sports nga gisakyan sa iyang asawa gumikan pakyas kining misunod sa patrol sa pulis.
Giingong nga sa paggawas ni Richard sa ilang gate, higayon sab nga minaug iyang asawa, apan wa pa niya kini mahalata gumikan hinay-hinay nga migawas sa pultahan.
Dihang iyang nasuta nga iyang asawa ang minaug, nagpangagot na siya ug misamot ang iyang kalagot dihang giayo'g halok sa drayber nga gibanabanang nagpangedaron og 27-anyos.
Mitawag og pulis ang professor, wa sab niya gipabiya ang sakyanan human nasuta nga nagluib diay si misis nga nagsulti nga di na maayong modala si mister sa ilang relasyon.
Pag-abot sa pulis, misakay ang mag-asawa sa patrol car ug gipasalig sa drayber sa Montero nga mosunod siya sa presinto uno.
Naglansis ang drayber nga di ibilin ang sakyanan kay basin ma-karnap.
Walay nahimo ang WCPD, gawas sa pagtala sa hitabo dungan sa pagduso sa kaso sa barangay level.
Ang maong hitabo gihisgutan sab sa jailer kagahapon didto sa Sta. Ana Police Station. (Jeepy P. Compio)
Gipatik sa mantalaang SuperBalita Davao Oktubre 31, 2015.
Linkback:
https://tubagbohol.mikeligalig.com/index.php?topic=81274.0
