Tuesday, January 29, 2013
KON wala nipalag ang upat ka mga senador, gamay ra nato ang nahibawo nga gawas sa gipaburot nga pork barrel aduna pay laing dakong kapangwartahan ang atong mga Senador.
Kini mao ang gitawag ug Maintenance and Other Operating Expenses (MOOE) nga pundo sa Senado ug mahimong mapagawas ubos sa kabubut-on sa Senate President.
Mikisi-kisi ang magsuong senador nga sila si Alan Peter ug Pia Cayetano ug sila si Senador Miriam Santiago ug Antonio Trillanes IV kay lagi kuno nagpabaga sa iyang dagway si Senate President Juan Ponce Enrile nga nanghatag ug cash gifts sa mga Senador niadtong miaging pasko.
Misaka ang presyon sa dugo ni Santiago kay kuno giwaldas ni Enrile ang buhis sa katawhan pinaagi sa paghatag og tag P1.6 milyones sa matag usa ngadto sa 18 ka mga senador.
Nag-alindasay si Alan Peter ug nikuwestiyon nganong silang upat nakadawat lang og tag P250,000? Iyang gihulagway nga ang gihimo ni Enrile pag-usik sa buhis sa katawhan nga angayan untang gamiton aron sa pagpakaon sa mga gipangutom nga mga Pilipino.
Nisangpot sa personalay nga binirahay sa Senado ang lantugi nila ni Enrile. Imbes ihan-ay ni Enrile ang iyang argumento nganong legal ang paghatag ug cash gifts, iyang giwara-warahan si Cayetano sa dokumento nga sumala pa P37 milyones nga utang kaniya sa namatay nga Senador nga si Rene Cayetano.
Imbes tubagon ni Cayetano kon tinuod bang nakaotang ang iyang amahan kang Enrile, iyang gilapdosan ug istorya ang Chief of Staff nga si Atty. Gigi Reyes nga sumala pa daw mao nay nagkontrolar sa gimbuhaton ni Enrile sa Senado.
Maayong masusi tinuod ug tarong kon wala ba giwaldas lang sa mga Senador ang buhis sa katawhan ug ipasangil lang nga MOOE, PDAF, financial grants, incentives, honorarium, o ubang teknikal nga termino nga dili masabtan sa ordinaryong tawo aron sa paglipat sa mga magbubuhis.
Dalaygon ang gihimo sa upat ka mga senador nga midiskurso sa pagpanalipod sa buhis sa katawhan.
Apan medyo kahibulungan lang kay nganong karon man lang sila mireklamo sa naandan nang cash gifts nga ipanghatag matag Pasko matag tuig sa mga Senador?
Nganong wala man sila mipalag sa cash gifts sukadpa sa panahon ni Senador Manuel Villar isip Senate President kaniadto? Nganong wala man sila nireklamo sukad nga nakalingkod si Enrile sa pagka Presidente sa Senado niadtong tuig 2008? Wala may imik sa cash gifts si Pia nga napili sa pagka Senador sukad niadtong tuig 2004. Hilom pas piranha si Alan Peter sa cash gifts sukad nga siya nahimong Senador niadtong tuig 2007.
Nganong si Santiago nga senior citizen na sa Senado karon man lang nag bruhaha sa cash gifts? Limpyo ba si Trillanes nga wala man niya pangisugi ang cash gifts sa dihang milingkod siya sa pagka Senador niadtong tuig 2010?
http://www.sunstar.com.ph/superbalita-cebu/opinyon/2013/01/29/banoc-cash-gifts-sa-senado-265465Linkback:
https://tubagbohol.mikeligalig.com/index.php?topic=66455.0
