Ni Darrel A. Carumba (Banat) | Updated November 16, 2012 - 12:11am
CEBU, Philippines - Patay ang managpuyo human sila giatangan ug gipamusil samtang naglakaw sa dalan paingon na untang mamauli gikan nga naninda didto sa Immaculate Heart of Mary Academy sa Poblacion Ward-4 sa lungsod sa Minglanilla niadtong Miyerkules sa alas 7:50 sa gabii.
Ang pulos patay nang nadangat sa tambalanan mao sila si Lellosa Flores, 42, minyo apan buwag na sa bana, banana vendor sa merkado sa lungsod ug patay usab ang iyang batan-ong kapuyo nga si Alexander Samson, nagpuyo sa samang lugar.
Duna nay lead ang kapulisan kun si kinsa ang mamumuno apan gitago lang una ang pangalan samtang padayon pa ang paghipos og mga ebidensiya batok niini.
Matud ni PO2 Vincent Alinabo sa Minglanilla Police dihang nahinabi sa Banat News gikan sa merkado nga naninda ang mga biktima ug naglakaw sila sa dalan paingon na untang mamauli pag-abot sa maong lugar gi-atngan kini sa suspek ug dayung gipamusil.
Ang mga biktima pulos naigo sa lain laing bahin sa ilang lawas ug dayung sibat sa suspek ug ang mga biktima gihatud unta dayun sa Minglanilla District Hospital apan pulos gideklarar nga Dead on Arrival kon DOA.
Subay sa imbistigasyun sa kapulisan nahibaw-an niini nga ang biktima nga si Flores minyo na kini ug dunay tulo ka mga anak nga dagku na ug human kini nagkabuwag sa iyang bana duna kini gikapuyo nga usa ka panadero nga iyaha usab nga gikabuwag ug nakigpuyo karun ning batan-on nga biktima.
Ang kapulisan nitutok sa love triangle ang posibling anggulo sa kremin nga gipalapdan pa sa nagpadayung imbistigasyon sa kapulisan. (BANAT NEWS).
Linkback:
https://tubagbohol.mikeligalig.com/index.php?topic=58490.0
