Ni Darrel Carumba (Banat) Updated July 23, 2011 12:00 AM
CEBU, Philippines - Patay ang usa ka 26-anyos nga lalaki human aksidenteng nakuryentihan samtang nanguryente og isda sa sapa sa sitio Kapuso sa barangay Poblacion lungsod sa Sibonga niadtong Huwebes sa alas 2:40 sa hapon.
Ang namatay mao si Ryan Abestano, 26, molupyo sa nahisgutang lugar kinsa nakaangkon og mga paso sa kalawasan.
Matud ni PO1 Bernard Banugon sa Sibonga Police Station dihang nahinabi sa Banat News nga si Abestano kauban ang mga barkada niini nagkasabot nga manguryente og isdang pantat sa sapa nga distansiya lang og 25 ngadto sa 30 metros gikan sa ilang balay.
Nagkutay sila og taas nga wire nga gisaksak sa ilang balay samtang ang pikas tumoy maoy ilang gigamit sa pagpanguryente.
Matud pa dihang nakakuha na sila og mga pantat ilaha na untang hipuson ang wire nga ilang gitusmod sa sapa apan si Abestano nga nagtungtong sa tampi ibabaw sa sapa aksidenteng nakahikap sa napaksit nga bahin sa wire hinungdan nga nakuryentihan kini. Tungod niini natagak siya sa tubig uban sa livewire ug didto nausban og kakuryente ug sa karatol sa iyang mga higala walay bisan usa kanila nga nakahunahuna pagdagan sa plangka sa kuryente aron kini pagngon.
Gihulagway nga nasunog gyud og maayo ang patay’ng lawas sa biktima dihang kini milutaw.
Milanat pa og pila ka minutos una pa napawong ang plangka ug diha pa nila maugkat gikan sa sapa ang nasunog nga lawas ni Abestano ug gidala sa Deiparine District Hospital sa lungsod apan gideklarar kini sa mga doktor nga patay na.
“Nagpatong ni siya sa ibabaw pagkahikap niya sa panit sa livewire ni ground nakuryentihan maong natagak sa sapa, nisamot na hinuon nalagom og maayo ang lawas,†dugang asoy ni Banugon. (BANAT NEWS)
Linkback:
https://tubagbohol.mikeligalig.com/index.php?topic=42434.0
