Ni Guam P. Logroño
Friday, August 3, 2012
BOMBERO ug giingong kabit niya nga masahista nga minyo usab nagkahiusa sulod sa prisohan sa Barili Police Station.
Unang nadakpan sa kapulisan ang babaye dihang naaktuhan sila sa bana niini nga naggakos ug ang bombero sulod sa fire station.
Ang bombero nakaeskapo sakay sa iyang motorsiklo.
Si FO2 Jerry Berdin, 47, minyo, sakop sa bombero sa lungsod sa Barili, taga Sitio Timpolok, Barangay Babag, dakbayan sa Lapu-Lapu gisikop niadtong Huwebes sa alas 9 sa gabii human giatake si Chief Insp. Marlon Gumabao, hepe sa Barili Police ug namaak sa imbestigador nga si SPO2 Marcelo Quevedo.
Si SPO1 Elmer Opsima, sa Barili Police kinsa usa sa mga arresting officer nga nahinabi sa Sun.Star Superbalita, nagkanayon niadtong Agusto 1, Miyerkules alas 9:05 sa gabii, gisikop si Marivic Ricaborda, 28, minyo, taga dakbayan sa Carcar masahista ug manikyurista nga nailang kabit ni Berdin.
Gipadayag ni Opsima nga nireklamo si Gonzalo, 29, traysikol driver, taga dakbayan sa Carcar, hinungdan nga gisikop si Marivic dihang naaktuhan nga naggakos ug si Berdin sulod sa buhatan sa bombero sa lungsod sa Barili.
Si Berdin nakasibat kay nasakay sa iyang motorsiklo ug wa na maapsi pa sa kapulisan Barili.
Apan nahibulong na lang sila niadtong Huwebes sa gabii kalit nitungha sa police station ang bombero ug gikaestorya si Gumabao nga iyang gimanduan nga buhian si Marivic.
Si Gumabao wa mosanong sanglit kasuhan kini sa bana og adultery samtang siya kasuhan sab og concubinage.
Gikatahong nangisog ang bombero hinungdan nga gimaymayan siya ni Gumabao nga mokalma ug ilang estoryahon sa tarong ang isyu sa iyang opisina.
Apan nasuko si Berdin, wa mosunod sa opisina ug giatake og kalit si Gumabao nga niresulta sa ilang nilayugay hangtud nga sila si Opsima ug imbestigador nga si SPO2 Quevedo niuwang aron mokalma ang bombero.
Inay mopatuo, giingong nangisog og maayo si Berdin ug gipaak pa sa bukton si Quevedo, hinungdan sa pagkaangol niini.
Dugang nakuhang impormasyon sa kapulisan nga ang masahista ug bombero dugay nang nagtipon hinungdan nga pwerting laguta sa bana dihang nakit-an niini nga diha sa fire station naggaksanay.
Gipatik sa mantalaang SuperBalita Cebu Agosto 04, 2012.
Linkback:
https://tubagbohol.mikeligalig.com/index.php?topic=53286.0
Topic: Bomberong minyo, kabit nga minyo naaktuhan sa bana, gidakop, tingkagol prisohan (Read 707 times)