Ni Rey Pasaporte (Banat) Updated May 12, 2011 12:00 AM
CEBU, Philippines - Pormal nang gidawat sa mga biyuda sa mga sakop sa Citizens Armed Forces Geographical Unit (Cafgu) ang tag P250 mil cash gikan sa Presidential Assistance Fund ni Presidente Benigno Simeon Aquino III.
Si Nimfa 39, biyuda ni Renato Baraquinito, 40, usa ka kanhi Cafgu Active Auxillary (CAA) nga taga Calbayog City nagkanayon nga dako na kaayong tabang kaniya nga may unom ka anak ang salapi nga gihatag sa Pamuno nasud.
Si Baraquinito nga bana ni Nimfa nakaserbisyo sa Cafgu sulod sa 20 na ka tuig ug namatay siya sa engkuwentro tali sa mga sundalo ug rebelde niadtong Nobiyembre 16, 2009 sa barangay Dawo, lungsod sa Oquindo District Calbayog City, Western Samar.
Ang kauban ni Renato nga nakalas niadtong higayona mao si Restituto Aniban, kansang asawa nakadawat usab og P250 mil.
Laing namatay sa engkuwentro sa nagkadaiyang dapit mao sila si Pvt. Eugene Daquil niadtong Marso 31, 2009 didto sa Bari, Tupaz Capiz City, Pfc. Jonathan Sibay namatay niadtong Hulyo 22, 2008 didto sa Sto. Niño Paranas, Western Samar, Cpl. Douglas Jumagdao namatay sa engkuwentro niadtong Mayo 30, 2009 didto sa barangay Polangi lungsod sa Catarman Northern Samar ug Cpl. Alexander Bayugo namatay niadtong Marso 3, 2008 didto sa New Minaro Motiong Samar.
Si Brig. Gen. Alejandro Estomo Officer in Charge sa Central Command ug maoy deputy commander sa Centcom nga nahinabi sa mga tigbalita nagkanayon nga importante kaayo ang maong kantidad sa mga nabiyuda alang sa pag-eskuyla sa ilang mga anak .
“They deserved to be given, they lost their love ones. Nawad-an sila og income,†pasabot pa niya ngadto sa mga nabiyuda.
Matud ni Estomo ang mga anak sa namatay nga Cafgu ug sundawo gihatagan og scholarship alang sa ilang edukasyon, ingon man house and lot.
Apan matud pa niya nga sa pagka karon gihikay kining maong mga benepisyo ug pribilihiyo sa ilang mga battalion commanders
Giawhag usab ni Estomo ang mga battalion commander sa nagkalain-laing unit sa kasundalohan nga mogahin gyud og kantidad alang sa ilang mga sakop nga makalas atol sa engkuwentro tali sa mga sundalo ug rebelde.
Kini tungod kay mitataw siya nga sa dihang nahimo pa siyang battalion commander sulod na sa pipila ka tuig sa AFP mohatag siya dayon og P5 mil ngadto sa mga asawa nga moduaw sa namatay nilang mga bana. (WC)(BANAT NEWS)
Linkback:
https://tubagbohol.mikeligalig.com/index.php?topic=40715.0
