Nila ni Brenda Batuto ug Rhea Mae Booc/EIM (Banat) Updated February 06, 2012 12:00 AM
CEBU, Philippines - Walay foul play nga nakita ang medico legal sa kamatayon ni Redentor Iscalicas,
kinsa giingong gikulata sa mga polis nga midakop kaniya sa Barangay Poblacion, Madridejos.
Si Dr. Joe Martin Fuentes sa PNP-Crime Laboratory-7 mibutyag sa The Freeman/Banat News nga walay ebidensyang
nagpakita nga nabun-og si Iscalicas base sa iyang pag-awtopsiya sa lawas niini.
Matud pa niya nakakita hinuon siya og buslot diha sa apdo ni Iscalicas nga gituohan niyang agi sa bitok
“May nakita akong bulate (bitok) probably it was the cause sa pagkabutas ng gallbladder niya at nag-leak
na rin ang bile (duga) doon sa gallbladder (apdo),†matud pa ni Fuentes.
Matud ni Fuentes dihang nahinabi sa Banat News nga imbes nag burot pa ang apdo napiyasok na kini
kay nahurot og kaawas ang sulod niining likido.
Usa ka bitok usab ang nakita ni Fuentes diha sa atay niini duol sa iyang apdo ug maoy gidudahan
ni Fuentes nga nakabuslot sa apdo niini.
Ang gallbladder o apdo maoy tapukanan sa mga masulod nga mga mineral salts ug tubig gikan sa atay
nga mahimong daw sip-on nga gitawag og ‘bile’(ang likidong pait gikan sa apdo) nga ipagawas sa lawas
kung adunay pagkaon sa sulod sa tiyan.
Dugang pa ni Fuentes nga bisan ang doktor nga unang miatiman kang Iscalicas wala makakita og
timailhang gibun-og kini.
Giesplikar usab ni Fuentes nga ang gipakitang mga litrato sa mga lagom sa patay’ng lawas ni Iscalicas
natural nga mogawas sa patay’ng lawas nga gitawag nila sa medisina og ‘post mortem lividity’ o
ang pagkanaog sa dugo ngadto sa kinaubsang bahin sa lawas sama sa likod (kung naghigda).
Si Iscalicas, 28, gialegar nga gikulata sa mga polis dihang kini nanghapak sa patrolcar sa mga polis nga
nagbantay sa diskohan sa Barangay Poblacion niadtong Enero 28.
Gidakop siya tungod sa kahubog ug gibuhian pagkasunod adlaw apan pag-abot sa ilang balay nagmulo
na kini sa kasakit sa iyang tiyan ug nangayo og tabang sa inahan nga si Cerila Iscalicas nga magpadala
kini ngadto sa Bantayan District Hospital.
Ang doktor nga miatiman kaniya nga si Dr. Jatoborn Batanagol mirekomendar dayon kaniya nga kinahanglang
maoperahan sa Cebu City tungod sa paggahi sa tiyan ni Iscalicas apan naabtan kini sa kamatayon.
Si Cerila mipasangil nga sa wala pa mamatay ang iyang anak kini mihingalan sa usa ka PO1 Jeffrey Barco nga
maoy mikulata kaniya. Ang banay’ng Iscalicas midangop na sa Criminal Investigation and Detection Group
aron magpatabang sa maong kaso.
Si Barco kinsa hugtanong mihimakak sa pasangil nga una nang nakuhaan og pamahayag sa The Freeman
mipadayag sa kaandam nga moatubang sa imbestigasyon sa CIDG ug sa Provincial Investigation and
Detective Management Branch aron limpyuhan ang iyang pangalan.
“Akoa mahatagan lang og hustisya ang namatay,†matud pa ni Barco. - BANAT NEWS
Linkback:
https://tubagbohol.mikeligalig.com/index.php?topic=47062.0
Topic: Bitok ang gikamatyan (Read 2874 times)