Ni Darrel Carumba (Banat) Updated March 07, 2012 12:00 AM
CEBU, Philippines - Naputos sa samad tinigbasan ug hapit pa maputol ang ulo dihang gitigbas ang liog sa usa ka lalaki ug laing usa pa ang naangol dihang sila gipangtigbas sa lalaking pildero sa sugal nga tong-its sa bukirang bahin sa barangay Agbanga lungsod sa Asturias niadtong Domingo sa alas 11:00 sa gabii.
Ang biktima nga nagkawilkawil na ang ulo mao si Ariel Delerio Diamada, 23, samtang naangol si Nicolas Garo, pulos mga molupyo sa nahisgutang lugar.
Samtang ang gitumbok nga suspek mao ang ilang kaduwa sa tong-its nga si Carlito Malaay, 49, nagpuyo usab sa maong lugar.
Matud ni PO2 Dandreb Lambo sa Asturias Police Station dihang nahinabi sa Banat News nagduwa pa og tong-its ang mga biktima ug suspek sa usa ka tindahan sa maong lugar nianang pagkasayong gabii diin napildi ang suspek ug nahiktan pa kini.
Apan tungod sa kadako na sa pilde sa suspek gisapot na kini ug miresulta sa panaglalis hinungdan nga gibadlong sila sa tag-iya sa tindahan kay buot nang manirado sa naulahi.
Gumikan kay dili naman siya makabawi pa kung maundang ang ilang sugal giingong way tingogtingog nga miuna og uli ang suspek nga wala na gani mananghid sa iyang mga kaduwa.
Dangtan pila ka gutlo mibalik ang suspek nga nagbitbit na og sundang dayon giatangan ang mga biktima sa ngitngit nga dapit ug sa paglabay sa duha kalit niya kining gipanigbas. Si Garo nga unang natigbasan apan nakasagang daling nakadagan apan pagkasayong buntag niadtong Lunes nakit-an nalang si Diamada nga nagbuy-od nga patay na duol sa sapa nga usa ka gatos metros sa lugar diin giatangan ug gitigbas si Garo nianang Domingo sa gabii.
Atol sa hot pursuit operation sa kapulisan nasikop ang gitumbok nga suspek ug gikatakdang pasakaan og kasong murder ug frustrated murder ngadto sa piskalya.(/EIM)(BANAT NEWS)
Linkback:
https://tubagbohol.mikeligalig.com/index.php?topic=48083.0
