MikeLigalig.com

Nangitag isagol sa binignit natagak patay
Ni Romeo T. Limpangog/EIM (Banat)

Patay ang usa ka tawo human matagak sa 35 ka tiil nga gihabugon nga punoan sa lubi nga iyang gikatkatan sa miaging Huwebes Santo sa hapon samtang nanguha og mga lahing nga bunga aron unta ilang gamiton sa lutuon nga binignit.

Si SPO2 Dexter Martin sa Investigation Detection and Management Bureau (IDMB) sa kapolisan sa Mandaue City Police Office (MCPO) miila sa namatay nga mao si Placido Gabohan, 55, taga barangay Guadalupe sa dakbayan sa Sugbo ug caretaker sa usa ka establisamento nga nahimutang sa dalan H. Abellana sa barangay Canduman sa maong dakbayan.

Sa gisugilon sa mga nakasaksi nga sila si Nora Mangubat, 37, minyo, Chona Galendo, 37, ug Marian Buro, 28, nga mga molupyo sa maong dapit nga nangutana lamang sila sa biktima kun aduna bay lahing nga lubi sa sulod sa compound niini.

Apan samtang sila nagpaabot, kalit lang sila nakadungog og lagubo sa nangatagak nga lahing ug dihang ilang gisusi atoa sa ibabaw si Placido nga nagsige og panguha niini.

Human sa ikaupat nga bunga nga nahagbong misunod og katagak si Placido sa ubos.Giingong nadakin-as kini gikan sa gitungtungang hakhak maong nahagbong ug namatay tungod sa grabeng kadaut nga nasinati sa iyang kalawasan.

Linkback: https://tubagbohol.mikeligalig.com/index.php?topic=41445.0