Ni Guam P. Logroño
Wednesday, February 23, 2011
GIAWHAG ni Monsignor Esteban Binghay ang mga ginikanan sa 10 anyos nga batang babaye nga gipakita sa mga kalag sa Dalaguete Central Elementary School sa Brgy. Poblacion, Dalaguete sukad pa niadtong Dominggo, nga ipahiling ang panglawas, ipasusi ang pangisip, ingon man spiritual nga kinabuhi niini.
Si Glydel Calisang, tinun-an sa grade 4, taga Barangay Banhigan sa maong lungsod nihilak human giingong gipakita sa usa ka kalag nga ginganlan og Nonita Cabal, kinsa nihangyo nga magpamisa sulod sa lima ka mga Dominggo.
Nisamot sa pagkalisang ang bata human daghan usab nga mga kalag nga niduaw sa ilang eskuwelhan nga nipadayag sa ilang pagsupak sa gihangyo ni Cabal.
Si Binghay nga nahinabi sa Sun.Star Superbalita nagkanayon nga gikinahanglan nga ipahiling ang panglawas sa bata kon wa bay sakit.
Ikaduha ipatan-aw sa psychiatrist aron masuta kon wa ba makaagi sa mga traumatic nga panghitabo ang bata, sama sa pagpanapat ug uban pa.
Ikatulo ipatan-aw ang spiritual aspect sa kinabuhi niini, kon aktibo ba sa simbahan, ingon man sa mga pag-ampo, kon di ba sila layo sa Ginuo.
Matod pa niya nga gikinahanglan nga sundon ang maong proseso sanglit dunay mga panghitabo diin nagtuo ang pamilya ug mga tawo nga nasudlan sa dautang ispiritu apan dihang gipahiling ang panglawas duna diay sakit.
Gipasabot niya nga kon masubay ang maong proseso, anha pa siya ipaubos a prayover sa ingon ma-alkontrahan ang mga tawo nga mohamok sa bata.
Usa sa himuon sa prayover mao ang paghaplas sa lawas sa bata sa “Lana Santa†kun sagradong olive oil nga gibinditahan sa simbahan aron mopalayo ang mga ispiritu.
Gibutyag usab niya nga dunay mga dautang espireto nga di madalag misa, ingon man holy water, o rosaryuhan.
Tungod niini, gihulagway ni Binghay nga wake-up call kini sa mga ginikanan ingon man sa katawhan nga gikinahanglan gyud kaayo ang ilang hugot nga pagtuo sa Ginuo, mag-ampo kanunay, ingon man pagsimba.
Si Binghay nibutyag nga si Calisang mamahimo nga ipahiling sa Mary Little Children Chapel diha sa Tabunok, dakbayan sa Talisay diin sagad niining ipa-ubos a pray-over kadtong mga bata nga gihamok sa mga dautang ispirite.
Gipasalig niini nga ang archdiocese sa Sugbu dunay tulo ka mga pari nga maoy gitahasan sa pag-prayer-over sa bata ingon man tawo nga masaniban sa dautang espiritu.
Gipatik sa mantalaang SuperBalita Cebu Pebrero 24, 2011.
Linkback:
https://tubagbohol.mikeligalig.com/index.php?topic=38192.0
