Tuesday, March 15, 2011
NATUSAK-TUSAK sa mga bala sa armas ang kalawasan sa usa ka ulitawo human siya gipusil sa pulis alas 7:45 sa gabii niadtong Dominggo.
Ang insidente nahitabo atubangan sa Diths Store, Tierra Verde Subdivision, Barangay Sasa, siyudad sa Davao.
Ang biktima giila nga si Jasper Libosada Samorin, 30, nagpuyo sa Gumamela Street, Land Mark Subdivision, Barangay Sasa samtang ang suspetsado mao si Police Chief Inspector Julius Cabahug, sakop sa Aviation Security Group.
Base sa blotter sa Southern Philippines Medical Center (SPMC), ang biktima nakaangkon og samad sa tiil, tuhod, kamot, nawong ug ulo nga miresulta sa iyang kamatayon.
Si Samorin gidala pa sa mga otoridad sa maong tambalanan sa pamasin nga matabang pa, apan gideklara siya sa mga doktor nga dead on arrival sa SPMC.
Ang gwardiya sa SPMC kinsa unang nakahinabi sa mga kabanay sa biktima nagbutyag nga mitambong ang biktima og birthday sa iyang paryente, apan migawas kadali sanglit duna siyay gihatud sa gawas sa ilang subdivision. Pipila ka minuto ang nakalabay, mga kabanay nabalaka sanglit wa na mahibalik ang biktima mao nga ilang gisubay ang dapit nga posibleng giagian sa biktima.
Giingon nga didto sa dapit diin nahitabo ang krimen, masiplatan sa kabanay ang motorsiklo sa biktima daplin sa kalsada mao nga nagsusi sila kung asa na si Samorin.
Nasayran gikan sa mga molupyo sa maong lugar nga ang biktima atua sa kanal nahulog human naglinayugay sila sa suspek.
Mga molupyo sa maong lugar nagsaysay nga nagmaneho ang biktima sa iyang motorsiklo, apan gipahunong siya sa suspek sa wa masayri nga hinungdan.
Sanglit gipahunong ang suspek, suma sa impormasyon, nasuko ang biktima ngadto sa suspek hinungdan nga nag-inilogay sila sa armas dayon milanog ang masipang buto nga miresulta sa pagkasamad ni Samorin.
Si Cabahug, human sa hitabo, daling mitahan sa iyang kaugalingon ngadto sa ilang labaw sa Aviation Security Group dayon giendosar sa Sasa Police Station.
Nakuha sa kapulisan gikan sa crime scene ang motorsiklo, unom ka basiyo sa bala 9mm kalibre nga pistola.
Sa pagsuwat ning balita, giandam na sa kapulisan ang kasong murder batok sa suspek aron ipasaka didto sa City Proscutor's Office (CPO). (Alger Dura)
Gipatik sa mantalaang SuperBalita Davao Marso 15, 2011.
Linkback:
https://tubagbohol.mikeligalig.com/index.php?topic=39033.0
