Ni Darrel A. Carumba/WC (Banat) Updated July 29, 2012 12:00 AM
CEBU, Philippines - Samdan ang usa ka bayut human tigbasa sa iyang giutangan idto sa barangay Anunang Norte siyudad sa Bogo sa miaging hapon.
Ang biktima mao si John Marsonia, 25, usa ka manikurista nga bayut nga nagpuyo sa maong lugar, samtang ang suspek nailhan usab nga si Herlen Lazo, 45, minyo nga tag-iya og sari-sari store nga silingan ra sa biktima.
Si PO3 Allan Dosdos imbistigador sa Bogo City Police Station mibutyag sa Banat News nga sa wala pa ang pagpanigbas gipaningil sa suspek ang biktima sa utang niini sa bugas nga P1,000 pinaagi sa usa ka suwat nga gi-address ngadto sa inahan sa naulahi.
Apan giingong pagkahuman og basa sa bayut sa maong suwat mihiwasa kini sa kasuko ug giingong giaway ang suspetsado didto sa tindahan sa naulahi kay matud pa nauwaw siya sa maong suwat.
Ang suspek nga wala makaantos sa mga gipanulti sa biktima napungot ug mikuha og sundang dayon gihabas niini ang biktima.
Ang biktima nga humok usab kaayo og lawas dali kaayong nakaikid busa wala masabak ang lawas niini ug didto sa tuo niyang paa tugpa ang hait nga suwab sa sundang.
Apan bisan og samaron ang biktima mikaratel pa og dagan pahilayo sa maong lugar sa paningkamot nga di siya tiwasan.
Unya midangop siya sa kapolisan aron pasakaan og kiha ang suspek. (BANAT NEWS)
Linkback:
https://tubagbohol.mikeligalig.com/index.php?topic=53133.0
Topic: Bayut gipaninglan siging yawyaw laslas hinuon ang paa kay gitigbas sa giutangan (Read 1330 times)