Ni Guam P. Logroño
Saturday, May 7, 2011
NAHABWA ang tinai sa usa ka barangay tanod nga napalgang patay sa iyang kabanay nga dunay daghang samad tinigbasan ug dinungbagan sa nagkadaiyang parte sa lawas sa kasagbutan niadtong miaging gabii sa Barangay Obo, lungsod sa Dalaguete.
Si Angelito Indig, hingkod ang panuigon, barangay tanod, forest ranger ug dunay kapuyo nagpuyo sa nahisgutang lugar, nakaangkog samad tinigbasan sa iyang lawas, kamot, braso, tiil, ug dinungban sa iyang dughan.
Si PO1 Arnel Calisang sa Dalaguete police nagkanayon nga ang kapuyo sa biktima nga ginganlan og ‘Jenny’ nitug-an nga sa miaging gabii, alas 9:00 pasado, nabalaka kini nga wa na mopauli ang biktima.
Giingong natingala ang kapuyo nga naandan sa biktima nga mopauli sa ilang panimalay kada alas 5 sa hapon matag adlaw gikan sa iyang umahan sa bukid.
Gipahibalo niya ang ilang kabanay ug gipangita nila didto sa ilang lugar apan nakurat nalang sila sa ilang nakita dihang nagbuy-od na kini sa kasagbutan nga way kinabuhi.
Matud ni PO1 Calisang, nihimo na og dugang imbestigasyon ang ilang mga kaubang pulis labot sa krimen.
Wa hinuon nila isalikway ang posiblidad nga dunay nasuko sa biktima diha sa bukid, sanglit gawas sa iyang pagka tanod, forest ranger usab siya nga nagbantay sa kalasangan.
Gipatik sa mantalaang SuperBalita Cebu Mayo 08, 2011. Linkback:
https://tubagbohol.mikeligalig.com/index.php?topic=40581.0
Topic: Barangay tanod napalgang patay, puno sa tinigbasan (Read 631 times)