Ni Brenda D. Batuto (Banat) Updated February 28, 2011 12:00 AM
CEBU, Philippines - Kasong estafa ang gipasaka batok sa usa ka giingong mangingilad kinsa nasikop sa miaging semana human kini ilha sa iyang nabiktima didto sa barangay Buhisan, dakbayan sa Sugbo.
Ang suspetsado mao si Kit Villanueva, 27, nga taga barangay Sawang Calero, dakbayan sa Sugbo kinsa gitumbok sa lima ka tawo nga giingong miilad kanila.
Si Vanessa Tormis, hingkod, nga taga barangay Pasil, siyudad sa Sugbo kinsa giingong maoy ulahing nabiktima ni Villanueva midangop sa kapolisan sa Punta Princesa Police Station human niini makita ang suspetsado didto sa usa ka tindahan sa barangay Buhisan.
Si Tormis mipasangil nga gitanyagan siya ni Villanueva og baratong Central Processing Unit (CPU) sa computer nga nagkantidad lang og P12,800.
Matud sa biktima nga gipasaligan siya sa suspetsado nga kun mohatag siya sa maong kantidad, ihatod dayon niya sa sunod adlaw ang maong butang.
Apan wala tumana sa suspetsado ang iyang saad ug wala na gayud kini mopakita sa biktima busa natahap na ang naulahi nga giilad siya niini.
Si SPO4 Reynaldo Orogenes sa Tabo-an Police Station nagkanayon nga ang suspetsado gi-turn-over sa ilang police station human kini masikop sa mga polis sa Punta Princesa.
Gibutyag ni Orogenes nga ang suspetsado ilado kaayo sa pagka-mangingilad ug gani nagpunay lang og ka-blotter sa ilang buhatan ang ngalan niini.
Matud ni Orogenes nga duha ka adlaw human masikop si Villanueva may duha ka mga giingong biktima usab niya ang misil-ing niini sa prisohan sa Tabo-an Police Station kinsa mibutyag nga kaping P50 mil ang nailad ni Villanueva gikan nila. Si Villanueva gipasakaan og kasong Estafa sa City Prosecutor’s office sa ulahi niyang biktima. - Ug Ria Mae Y. Booc sa The Freeman/WC (BANAT NEWS)
Linkback:
https://tubagbohol.mikeligalig.com/index.php?topic=49641.0
