Tuesday, March 8, 2011
MAAYONG pagkatabas sa walang bukton sa usa ka lalaki human gihapsan sa hait nga sundang sa iyang asawa alas 8 sa gabii niadtong Lunes.
Ang biktima gitago lang sa pangalan nga Dennis, 27, samtang ang suspek gitago sab sa pangalan nga Caroline, 23, pulos nagpuyo sa Barangay Leon Garcia, distrito sa Agdao, siyudad sa Davao.
Ang blotter sa Southern Philippines Medical Center (SPMC) nagbutyag nga ang biktima nahiabot sa maong tambalanan alas 8 pasado sa gabii niadtong Lunes.
Ang biktima nagbutyag sa mga gwardiya nga nagpakisayud kaniya nga sa wa pa mahitabo ang pagpanigbas, nagkalalis sila sa iyang asawa.
Giingon nga nasuko lamang ang asawa ngadto sa iyang bana kinsa dugay nakauli sa ilang balay.
Ang panaglalis miresulta sa pagdinumogay hinungdan nga wa na makaantos ang asawa miadto siya sa kusina dayon mikuha og sundang.
Sa paghibalik ni Caroline sa nahimutangan sa biktima, way daghang pangutana gitigbas ang biktima nga miresulta sa pagkasamad sa iyang walang bukton.
Ang biktima daling nagpatambal sa SPMC samtang ang suspek nagpabilin lamang sa ilang balay.
Samtang giatiman ang biktima sa mga doktor, naghuna-huna sab siya kung unsa ang iyang himuon bahin sa maong kaso nga gikalambigitan tali nilang magtiayon. (Alger Dura)
Gipatik sa mantalaang SuperBalita Davao Marso 09, 2011. Linkback:
https://tubagbohol.mikeligalig.com/index.php?topic=38668.0
