Ni Darrel A. Carumba/EIM (Banat) Updated May 04, 2011 12:00 AM
CEBU, Philippines - Nakalingkawas sa tinong kamatayon ang magtiayon nga kalit girakrakan atol sa ilang paggawas sa balay nga nagdilaab ang atop diha sa barangay Cabcaban lungsod sa Barili niadtong Lunes sa alas 6:30 sa gabii.
Ang biktima mao ang magtiayon nga sila si Jose Mabanag, 52, ug asawa nga si Edna Mabanag, 62, mga molupyo sa nahisgutang lugar.
Samtang padayon pang gisusi si kinsa ang mga kriminal sa maong hitabo. Ang gidangatan sa duha nahitabo na sa ilang mga katiguwangan ug paryente kaniadto apan walay natumbok nga responsable sa maong mga krimen.
Matud ni PO2 Zaldy Orello sa Barili Police Station dihang nahinabi sa Banat News nagkaon ang duha dihang namatikdan nilang nasunog ang ilang nipa nga atop.
Tungod niini dali silang migawas apan kalit nga may tawong mirakrak kanila. Si Jose naigo sa walang bukton samtang sa tuong abaga usab naigo ang asawa niini ug pulos gidala sa tambalanan ug luwas na sa piligro.
Sa report sa DyHP, ang anak sa magtiayon nga si Norma mibutyag nga ang mga ginikanan sa iyang amahan nga sila si Eutiqio ug Petrolina Mabanag susama gihapon ang gidangatan kaniadto. Gidauban ang ilang balay ug gipamusil. Wala hinuon ibutyag ni Norma kun nakalas ba ang duha.
Nasundan pa kini sa iyang iyaan nga si Erica Parba kansang balay gidauban gihapon ug sila girakrakan, sa kahadlok si Parba mibalhin og puyo sa Leyte samtang mibalhin usab sa Negros ang iyang uyoan nga si Arquilles Parba tungod gihapon sa susamang matang sa pagpangatake kaniadto. - BANAT NEWS
Linkback:
https://tubagbohol.mikeligalig.com/index.php?topic=40498.0
