2 ka tawo gilayog sa 'Ungo'
Ni Rey Pasaporte (Banat) Updated March 28, 2012 12:00 AM
CEBU, Philippines - Gibati na og kahadlok ang mga residente sa barangay Lindogon sa lungsod sa Sibonga ingon man sa bukirang barangay sa lungsod sa Argao tungod sa sibaw nga mga tabi-tabi nga dunay ungo nga magsuroysuroy sa ilang lugar panahon sa kagabhion sukad pa sa miaging buwan.
Ning bag-o lang duha ka mga tawo, usa niini diha sa barangay Poblacion ug ang usa taga barangay Lindogon ang nangangkong gihamagan sa giingong ungo nga usa ka babaye. Gani ang mga tawo sa lugar nagtinir na karun og suwa o suha, bagakay ug panumbol nga usa ka klase sa tanom nga tunokon nga gituohan kaniadto pang pangontra og ungo, wakwak ug dautang mga nilalang.
Si Nicomedes Gimenez, 47, taga barangay Lindogon, nga nahinabi sa Banat News misaysay nga nabiktima na siya sa maong ungo dihang kalit siyang gituok samtang nanihapon sulod sa ilang balay.
Nagtuo siyang gibinuangan lang siya sa iyang mga barkada niadtong higayona apan dihang iyang gikuptan ang kamot nga mituok kaniya tag-as kaayo og kuko ug kusgan.
“Akong gihiram diri, tag-as kuko lugos ko kabarog tungod sa kakusgan, akong gisikaran ang lamesa unya nabira naku iyang buhok nga taas mao to nakakuha ko sa sundang, nilayat na siya sa pultahan,†sumala pa niya.
Laing residente nga si Manuel Antoque, 29, nga nahinabi usab sa Banat News mitug-an nga ang iyang inahan nga nanugway og baka sayo sa kaadlawon dili palang dugay kalit gisakdapan og dako kaayong langgam.
“Taga bukid kuno natakdan na ra ba unya minyo manang bayhana og langyaw may anak pero gibiyaan kay nahibulong ang kano (langyaw) nga mawala kuno sa ilang balay og alas- 12 sa tungang gabii, mao nay gidungog-dungog ngari,†pamahayag pang Antoque.
Si Fe Guzman, 49, biyuda nga taga sitio Lampitaw sa barangay Lindogon nga nahinabi sa Banat News nagkanayon nga dunay magtiayong taga barangay Tabon sa Argao nga giingong bag-o lang natakdan sa pagkaungo.
“Ang asawa kuno mahimong iring unya ang bana mahimong iro ug ang inahan mahimo sab nga pabo,†asoy pang Guzman.
Siya mipakita ning tigbalita sa panumbol diha sa iyang tindahan nga maoy iyang dad-on kun siya magabhian og pauli sa ilang balay gikan maninda kilid sa shrine ni Mama Mary.
“Hadlok uy, maglakaw ko magabii magbitbit ko ani, (panumbol) pangontra sa aswang,†dugang pa niya.
Matud niya nga duha na ka semana nga nakadungog siya nga dunay gi-ungo sa ilang lugar hinungdan nga misamot karun ang iyang kahadlok ug sa uban pang mga tawo sa ilang lugar.
Apan si PO2 Arnold Frenal sa Sibonga Police Station nga nahinabi sa Banat News mitataw nga wala pa sila makadawat og report nga dunay giungo sa bukirang lugar sa Sibonga.
Apan ang iyang kaubang pulis mitug-an nga duna siyay nadunggan niadtong miaging buwan nga dunay usa ka lalaki nga giingong gikawras sa ungo. (EIM)(BANAT NEWS)
Linkback:
https://tubagbohol.mikeligalig.com/index.php?topic=48797.0
