Ni Joy F. Tumulak
Saturday, July 16, 2011
GIDUL-ITAN sa agtang ang usa ka babaye una pa gipusil patay sa usa ka gunman sa dan Terry Ville, Lahug, dakbayan sa Sugbo.
Usa sa mga gitutokan karon sa kapulisan mao ang love triangle kay ang biktima dunay kapuyo nga langyaw.
Ang biktimang namatay paghiabot sa Vicente Sotto Memorial Medical Center (VSMMC) giila sa kapulisan nga mao si Jenny Consuelo, 30, taga sityo Sayaw, Barangay Kalunasan, ning dakbayan.
Sa pasiuna nga imbestigasyon nga gihimo nila ni PO3 Geofrey Gutual ug mga kauban sa Homicide Section sa Cebu City Police Office (CCPO) nagkanayon nga nag-estambay ilawom sa kahoy ang biktima uban sa iyang uyab nga si Cristopher Asoy, 27, taga San Fernando, Sugbo.
Ilang kuyog ang ilang higala nga si Mary Grace Suarez, 24, taga Guadalupe.
Wa magdugay, niabot ang usa ka itom nga XRM motorcycle nga may duha ka mga tawo nga nagsakay og motorsiklo ug nag-helmet.
Nikanaug ang back rider ug niduol kini kanila dayon nibunot sa dala niini nga armas.
Nangutana kini sa nagmaniho sa motorsiklo nga “Asa ani, Bay?,†dayong pusil tumong sa agtang sa biktima.
Human sa pagpusil, kalma nga nitalikod ang mamumuno dayong sakay og balik sa motorsiklo ug ningsibat.
Wa makalihok sila si Asoy ug Suarez tungod sa kahadlok ug wa na makatan-aw sa plate number sa motorsiklo.
Dugang nahipos nga kasayuran sa kapulisan, si Asoy nitug-an nga iyang uyab ang biktima.
Aduna kiniy kaipon nga ginganlan og “John†nga usa ka langyaw.
Si Suarez nitug-an usab sa kapulisan nga nakamay-ong siya sa mga killer nga makatulo na ka mga higayon nga nahalabay sa dapit ug may gipangita.
Wa siya magdahom nga ang biktima maoy tumong sa duha.
Wa mopakita sa tambalanan o moatubang sa kapulisan ang kaipon sa biktima nga usa ka langyaw.
Ang kapulisan sa Homicide Section mopalawom pa sa ilang imbestigasyon aron masuta gyud unsay motibo.
Gipatik sa mantalaang SuperBalita Cebu Hulyo 17, 2011. Linkback:
https://tubagbohol.mikeligalig.com/index.php?topic=42281.0