By Marvin Pineda
Sun Star
Usa ka lalaki ang namatay human gipusil sa usa sa duha ka mga babaye didto sa Tagum Overland Transport Integrated Terminal dakbayan sa Tagum.
Giila ang biktima nga mao si Turko Ayala "alyas Amang," hamtung ang panuigon ug way permanenting pinuy-anan.
Sa report gikan sa Tagum City Police Station, nasayran nga nahitabo ang pagpamusil alas 6:45 sa gabii, Martes sa nahisgutang dapit.
Nag-inusarang nagbaktas ang biktima didto sa lugar dihang kalit nga miabot ang usa ka motor sakay ang duha ka mga babaye.
Sa way paglangan, usa sa mga suspek ang mihulbot sa iyang armas dayon pusil ngadto sa biktima kaduha ka higayon.
Ang biktima nahiagum og samad pinusilan sa kalawasan hinungdan sa iyang hinanali nga kamatayon.
Human sa pagpamusil mga suspek dayong misibat padulong sa wa matino nga lugar sakay sa ilang "get-away" nga motor.
Linkback:
https://tubagbohol.mikeligalig.com/index.php?topic=29282.0
