SuperBalita Cebu
Ni Guam P. Logroño
Sunday, April 6, 2014
USA ka babaye nga giila sa kapulisan nga bigtime drug pusher gipusil sa ulo sa mamumuno nga nagsakay og motorsiklo, patay.
Ang pagpamusil nahitabo sa Sitio Lawis, BaÂrangay Luray 2, dakbaÂyan sa Toledo niadtong Sabado sa alas 8:30 sa gabii.
Ang biktima mao si Dionesia "Janet" Palao, 44, taga Barangay Dumlog, Toledo ug ex-convict sa kasong illegal drugs, patay human maayong pagkabuak sa ulo dihang naigo sa bala sa armas nga kalibre .45.
Si Chief Insp. Michael Anthony Bastes, hepe sa Toledo police, nagkanayon nga drugas ang motibo sa pagpusil sa biktima.
Sumala sa kapulisan, si Palao ug ubang kakompetensiya niini sa illegal nga drugas sa dapit gikatahong higpit nga nagkaaway hinungdan nga wala nila isalikway nga drugas ang motibo sa pagpamusil.
Ang biktima gikatahong naglakaw lang kini daplin sa dalan dihang gisundan sa gituohan nila nga duha ka tawo nga nagsakay og motorsiklo dayon gipusil sa ulo makausa ka higayon.
Sa pag-abot sa kapulisan sa dapit, wala nay kinabuhi ang biktima. nakuha ang usa ka kabhang sa kalibre .45 sa dapit ug drug paraphernalia.
Si Bastes niingon nga posibling naghatod sa illegal nga drugas ang biktima diha sa dapit, dihang gisundan sa iyang kakompetensiya.
Gibutyag ni Bastes nga niadtong miaging semana nakadawat sila og impormayon nga ang biktima dunay gidalang tunga sa kilo nga shabu diha sa ilang lugar uban niini ang duha ka wala mailhing lalaki apan wala nila makit-i ug nakugang na lang sila human sa Sitio Lawis naghatod og drugas ang gipatay.
Ang mga residente sa dapit nibutyag nga ang biktima sagad sa ilang lugar mag-dispose sa illegal nga drugas.
Ang biktima nabilanggo na kaniadto sa Muntinlupa tungod gihapon sa illegal nga drugas, apan nagawas na kini human makaserbisyo sa sentensiya apan mibalik sa pagpamaligya.
Linkback:
https://tubagbohol.mikeligalig.com/index.php?topic=78091.0
