Ni Bryner Diaz (Banat) | Updated August 31, 2013 - 12:00am
CEBU, Philippines - Usa ka drayber sa habal-habal ang gireklamo sa iyang kanhi kapuyo human kini mipasangil nga gilugos siya niini diha sa barangay Pitogo sa lungsod sa Consolacion mga alas 11:45 sa gabii niadtong Agosto 28, 2013.
Ang suspetsado nga 27-anyos (pangalan gitago) residente sa Pitogo, lungsod sa Consolacion. Samtang ang biktima mao ang 20- anyos nga dalaga nga nagpuyo usab sa maong dapit.
Base sa taho sa Cebu Provincial Police Office nga samtang sulod ang biktima sa iyang giabangan nga apartment dunay nanuktok sa iyang pultahan ug sa pag-abli niya iyang nakita ang iyang kanhi kapuyo nga nagbarog gawas sa pultahan.
Dugang pa sa maong taho nga sa walay igong rason mibunot ang suspetsado sa wala pa matinong kalibre sa pusil ug dayong duot niini sa pultahan.
Samtang naa na sila sa sulod giguyod sa suspetsado ang biktima sulod sa lawak ug gitionan sa armas ang biktima ug gilugos.
Igo na lang sa pagsumbong sa kapolisan nianang pagkabuntag ang biktima hinungdan sa pagsikop nila ni PO3 Renato Prieto, PO3 Arthur Ariete ug PO1 Jeffrey Cabantaña.
Nasikop ang suspetsado ug nakuha gikan kaniya ang usa ka lighter nga toy gun nga gituohang maoy iyang gigamit sa suspetsado sa pagtion sa biktima.
Sa pakighinabi sa Banat News ni PO3 Marjorie Taller sa Consolacion Police Station siya miingon nga dili na mopasaka og kaso ang biktima sa suspetsado. (/EIM) (BANAT NEWS)
Linkback:
https://tubagbohol.mikeligalig.com/index.php?topic=75125.0
