Friday, March 11, 2011
DUHA ang nakabsan sa kinabuhi samtang naangol ang ubang mga trabahante sa usa ka kompanya human nahulogan og kahoy nga gikarga sa dagkong trak samtang nagbaklay sa Centro Dalirig, lungsod sa Manolo Fortich Bukidnon.
Nahitabo ang insidente kagahapon mga alas 4:00 sa kadlawon.
Giila ang mga namatay nga sila si Amelinda Ragmac ug Elineta Mapa, mga residente sa Mangima, susamang lungsod ug gikan pa sa ilang trabaho sa Del Monte Philippines Inc.
Kritikal usab ang kahimtang sa laing kauban nga si Rosie Benongcal, 42, kinsa nagisi ang tangkugo.
Luwas na sa makuyawng kahimtang ang usa, Alejandro Bano, 49, taga Mangima, susamang lungsod.
Si Bano nibutyag nga nilabay ang dako nga trak nga kargado og mga dagko nga kahoy apan kalit lang nga nahulogan ang mga biktima. Nabali usab ang spinal cord sa usa ka biktima nga maoy gituohang hinungdan sa hinanaling kamatayon.
Pakyas lamang sa pag-ila ang mga biktima sa maong trak tungod sa kangitngit ug nisutoy lamang kini sa pagpadagan nga daw walay nahitabo.
Dali usab nga nagpatabang sa Manolo Police Station ang mga kauban nga wala naapil ug gitaho ang hitabo hinungdan nga nagmando ang kapolisan nga atangan ang maong trak sa sunod nga lugar diin giingong paingon sa Bukidnon nga bahin.
Ang kaso gisunod na sa kapolisan sa maong dapit aron pagsikop sa driver sa truck nga maoy dako og tulubagon sa hitabo. ( Stephanie V. Berganio)
Gipatik sa mantalaang SuperBalita Cagayan de Oro Marso 12, 2011. Linkback:
https://tubagbohol.mikeligalig.com/index.php?topic=38885.0
