Ni Stephanie Viovicente-Berganio
Duha ka mga insidente sa pagpangluba ang nahitabo niadtong Dominggo sa hapon ning siyudad sa Cagayan de Oro ug usa sa lungsod sa Misamis Oriental human na sa away ni Manny Pacquiao ug Miguel Cotto.
Unang biktima mao si Ronnel dela Cruz, 22, taga Blk 4, Puntod ning siyudad kinsa giluba ni Rico Namoc, sa susamang dapit human nagkabikil sa estorya.
Ang kapolisan sa Police Station 5 (PS5) sa Macabalan nibutyag sa Sun.Star Superbalita nga giingong kalit lang nga nanulong ang biktima ug gihagit si Namoc og away hinungdan nga gisuklan usab sa suspetsado.
Sa kasuko ni Namoc sa gihimong pagpanghagit nikuha kini og kutsilyo dayon giluba si dela Cruz sa tiyan nga bahin.
Nitumaw usab ang taho nga nagkalalis ang biktima ug nagkabikil sa away ni Pacquiao ug Cotto.
Gidala ang biktima sa Northern Mindanao Medical Center (NMMC) kinsa padayon pa nga giobserbahan sa mga doktor ang kahimtang.
Samtang samad gihapon sa tiyan ang naangkon ni Allan Macabitsa, 30, minyo, lumad nga taga Maitom, Alae, Bukidnon, human giluba sa igsuon niini niadtong Domingo mga alas 4:40 sa hapon.
Giila ang suspetsado nga mao si Annie, kinsa adunay gikaaway niadtong higayona.
Tungod sa kaluoy ni Allan nga unsay mahitabo sa igsuon, niaparta kini sa gikaaway niini apan natingala na lamang ang biktima dihang nitaroy na ang kutsilyo sa iyang tiyan nga bahin.
Uwahi na dihang nahibaw-an sa igsuon nga si Allan ang nalubaan.
Hinuon si Annie nangayo na og pasaylo tungod kay wala gidahom niini nga maunay pagluba ang igsuon.
Linkback:
https://tubagbohol.mikeligalig.com/index.php?topic=23881.0
