COTABATO CITY -- Naresulba na ang 50 ka tuig nga rido o away pamilya sa unom ka pamilya didto sa Buldon, Maguindanao Province.
Kini human nga gihimo ang rido settlement didto sa headquarters sa 603 Brigade sa Philippine Army didto sa Barangay Pigcalagan, Sultan Kudarat.
Apil sa mga pamilya nga gihusay ug nanumpa sa Quran mao ang mga pamilyang Malambot, Kudanding, Ebrahim, Macauyag, Alo ug Cawi.
Nasayran nga ang unom ka pamilya mga miyembro sa Moro National Liberation Front (MNLF) ug Moro Islamic Liberation Front (MILF).
Nanguna sa paghusay rido sa unom ka pamilya mao si Buldon Municipal Mayor Abolaiz Manalao, Governor Esmael Mangudadatu uban sa mga militar, kapulisan ug mga Muslim elders.
Kahibaloan nga daghan nang kinabuhi ang nakalas ug nadaut nga kabtangan sa dugay na nga away sa maong mga pamilya.
Kini nag-ugat sa bingkil sa yuta nga ilang giugmad nga milala nga nahulog sa personal nga dumot sa magkaaway nga pamilya.
Nanghinaut si Mangudadatu nga respetuhon sa matag pamilya ang ilang panaad ug dili na mausab ang engkuwentro tali sa mga armadong pamilya nga naa sa Buldon, Barira ug Matanog sa probinsiya. (Edgar E. Fuerzas)
Gipatik sa mantalaang SuperBalita Davao Septembre 08, 2015.
Linkback:
https://tubagbohol.mikeligalig.com/index.php?topic=80925.0
