Ni Jeepy P. Compio
Saturday, February 14, 2015
DAVAO CITY - Gipasakaan og kaso ang usa ka school administrator sa iya mismong bana human masakpan nga nakighilawas sulod sa ilang balay.
Dungan nga gipangposasan sa kapulisan sila alyas Richel, 40, minyo, nagpuyo sa Panorama Homes, Barangay Tigatto, Buhangin District ug si alyas Encio, 34, ulitawo, supervisor, nagpuyo sab sa nasampit nga barangay.
Subay sa spot report nga gipagula sa Buhangin Police Station nasayran nga alas 3:10 sa kaadlawon niadtong Biyernes, mismong ang bana ni Richel nga si alyas Noel, 42, seaman, ang nakasakop sa duha nga nag-sex sud sa ilang kuwarto sa balay.
Sa impormasyon nga nakalap sa Sun.Star Superbalita, giingong wa nasayran sa asawa nga miuli ang iyang bana gikan sa iyang biyahe sa abroad.
Dugang nasayran nga dunay mitaho sa bana sa binuhatan sa iyang asawa samtang toa siya sa abroad maong nahukman niini nga mouli nga di ipahibalo aron nga ukyon ang asawa.
Sa pag-abri sa bana sa ilang kuwarto, nasakpang nag-akob ang duruha samtang gisaw-an ang tawag sa lawasnong kalipay hinungdan nga gipangposasan sa gidala na niyang daan nga mga pulis.
Kagahapon sa udto, gikatahong mipiyansa ang duruha alang sa ilang temporaryong kagawasan sa kasong adultery.
Linkback:
https://tubagbohol.mikeligalig.com/index.php?topic=79501.0
