MikeLigalig.com

Ni Dennes R. Tabar
Tuesday, April 15, 2014


BANA nga nagduda nga dunay laing gikabuangan nga lalaki, gituohang nagpakaaron ingnong natulog pa samtang nagdug sila sa iyang asawa kagahapon sa buntag.

Tuod man, hinayhinay nga nibangon ang asawa, nigawas sa ilang gipuy-an aron pag-adto sa balay sa ilang silingan nga lalaki.

Wa siya masayod nga ang iyang bana naniid na diay kanila.

Kagahapon sa alas 7 sa buntag, naabtan ni Samson (di tinuod nga ngan gipugngan), 30, si Delilah (di tinuod nga ngan), 34, nga nagkigsulti pa niadtong higayuna sa lalaki nga giingong iyang uyab.

Nagubot ang mga lumolupyo sa Brgy. Agus, dakbayan sa Lapu-Lapu dihang naglagubo ang gipuy-an sa lalaki kay dunggabon na unta ni Samson ang iyang silingan.

Apan nakalugnot ug nakadagan ang lalaki nga giila lang ni PO3 John Carlo Jucotan nga si Kid.

Si Jucotan niingon nga kay nakadagan si Kid, ang babaye maoy napahimungtan sa suspek sa iyang kasuko.

Iya kining gidunggab sa maka-15 ka mga higayon sa nagkadaiyang bahin sa lawas.
Ang biktima samdan sa iyang tutoy ug mga tiil.

Gituohang nisukol ang asawa aron manalipod sa kaugalingon.

Unang gidala ang biktima sa Lapu-Lapu District Hospital, apan gibalhin dayon sa usa ka tambalanan sa dakbayan sa Sugbo.

Dugang nasayran nga ang suspek gikan na sa prisohan.

Ang ilang relasyon ug panaghigugmaay sa bilanggoan nagsugod kay si Delilah tigkuyog sa iyang amiga nga dunay kanunay giduaw sa bilanggoan.

Dihang nakagawas ang lalaki, nagminyo silang duha.

Tungod sa hitabo, kon mopasakag kaso ang ba­baye batok sa iyang bana, hayan mabalik sa bilanggoan si Samson.

Wa pa masayod ang kapulisan kon unsa nay kahimtang ni Delilah sa pagsuwat ning taho. DRT

paksit. gi putol na lang unta ni delilah ang buhok ni samson. wa man tawon ni sila mosunod sa script.

Kaluoy sa asawa, usa ka buntag kaduha madunggabi. OK lang ang pagdunggab sa uyab, ang sa bana maoy mas hapdos...

back to prisohan nalang ka, doy.